DAMU INENAYO MEMA.

GLORY OF CHRIST TANZANIA CHURCH (GCTC)

KANISA LA UFUFUO NA UZIMA MOROGORO

JUMAPILI: 03 SEPTEMBA, 2017

      MHUBIRI: MCHUNGAJI BARAKA NJAMASI (Snp) MAHENGE

Mchungaji kiongozi wa mahenge akihubiri katika ibada ya leo  

Damu ni kimiminika ambacho kipo ndani ya mwili na kazi yake ni kusafirisha chakula, hewa (oxygen) ndani ya mwili au kiumbe hai. Damu kwa asili ndio inayobeba UHAI wa mtu. Waebrania 12:24 Imeandikwa, na Yesu mjumbe wa agano jipya, na damu ya kunyunyizwa, inenayo mema kuliko ile ya Habili. Hii ni damu ya Yesu ndio inenayo mema.Mwanzo 4:10 Imeandikwa, Akasema, Umefanya nini? Sauti ya damu ya ndugu yako inanililia kutoka katika ardhi.  Hawa ni watoto wa Adamu waliokuwa wakimtolea Bwana sadaka za kuteketezwa. Kaini na Habili walikuwa wakulima na wafugaji. Habili alimtolea Bwana sadaka ya ng’ombe walionona kutoka kwenye zizi lake. Bwana akazitakabali sadaka zake na ndugu yake Kaini akaona wivu na akamuua. Ndipo Bwana akamuuliza Kaini umefanya nini, maana damu ya ndugu yako inanililia. Tunajifunza ya kwamba Damu inaweza kusema au kunena. Lakini baada ya agano jipya ndipo Bwana akamtoa mwanae wa pekee afe msalabani. Kwa kufa kwake damu yenye uhai ilimwagika, na ndio maana neno linasema ya kwamba damu ya Yesu ni Damu inenayo mema.

Walawi 17:10-11 Imeandikwa, ‘Kisha mtu awaye yote wa nyumba ya Israeli, au miongoni mwa hao wageni wakaao kati yao, atakayekula damu, ya aina yo yote, nitakunja uso wangu juu ya mtu huyo alaye damu, nami nitamkatilia mbali na watu wake. 11 Kwa kuwa uhai wa mwili u katika hiyo damu; nami nimewapa ninyi hiyo damu juu ya madhabahu, ili kufanya upatanisho kwa ajili ya nafsi zenu; kwani ni hiyo damu ifanyayo upatanisho kwa sababu ya nafsi.’ Damu ndio inayobeba uhai wa mtu. Tangu agano la kale mpaka sasa damu inaleta upatanisho. Yesu alikufa msalabani ili aondoe laana juu yetu. Damu yake ikamwagika kichwani kwa miiba ili akili zetu ziweze kuwa sawa. Mathayo 27:29 Imeandikwa 29 Wakasokota taji ya miiba, wakaiweka juu ya kichwa chake, na mwanzi katika mkono wake wa kuume; wakapiga magoti mbele yake, wakamdhihaki, wakisema, Salamu, Mfalme wa Wayahudi!. Damu yake ikamwagika kwa misumali ya mikononi. Yohana 20:27 Imeandikwa 27 Kisha akamwambia Tomaso, Lete hapa kidole chako; uitazame mikono yangu; ulete na mkono wako uutie ubavuni mwangu, wala usiwe asiyeamini, bali aaminiye. Alitokwa damu mikononi ili kutupa uwezo wa kugusa na kupata, kwa sababu mikono inabeba sehemu kubwa ya maisha yetu. Yawezekana ukishika pesa zinapotea, ukianza miradi haiwezi kuendelea. Leo iko damu ya Yesu ili kurudisha uweza wako wa kushika kwa mkono wako na ukala matunda ya kazi yake.

Damu ya Ubavuni.

 Yohana 19:33-34 Imeandikwa 33 Lakini walipomjia Yesu na kuona ya kuwa amekwisha kufa, hawakumvunja miguu; 34 lakini askari mmojawapo alimchoma ubavu kwa mkuki; na mara ikatoka damu na maji.  Hii ni damu iliyomwagika ili kuturudishia uhai wetu. Hii ndio damu inayobeba uzima wa ndoa zetu. Hii ndio damu inayozuia mabaya juu na kila aina ya mauti juu ya maisha yetu. Itumie damu hii kutamka uzima juu ya ndoa, kazi, biashara, elimu na kila kilichokwama na utakuwa mzima tena kwa damu ya Yesu.  Damu inasema asome, amiliki, atawale, ashinde, azae, aoe, aolewe na kushinda kuliko kawaida.

Damu ya Mgongoni.

 Yohana 19:1 Imeandikwa 1 Basi ndipo Pilato alipomtwaa Yesu, akampiga mijeledi. Hii ni damu iliyomwagika kwa sababu ya mijeredi 39 aliyopigwa mgongoni. Alipigwa baada ya Wayahudi kumtafutia visingizio vingi sana lakini hawakupata hata sehemu yoyote.  Isaya 53:5-5 Imeandikwa, ‘Hakika ameyachukua masikitiko yetu, Amejitwika huzuni zetu; Lakini tulimdhania ya kuwa amepigwa, Amepigwa na Mungu, na kuteswa. 5 Bali alijeruhiwa kwa makosa yetu, Alichubuliwa kwa maovu yetu; Adhabu ya amani yetu ilikuwa juu yake, Na kwa kupigwa kwake sisi tumepona.’ hii ndio damu inenayo mema dhidi ya magonjwa, balaa na taabu juu ya maisha yetu.  Ni kwa kupigwa kwake tunapokea uzima kwa jina la Yesu.

Damu ya Usoni.

Luka 22:42,44 Imeandikwa  ‘akisema, Ee Baba, ikiwa ni mapenzi yako, uniondolee kikombe hiki; walakini si mapenzi yangu, bali yako yatendeke. 44 Naye kwa vile alivyokuwa katika dhiki, akazidi sana kuomba; hari yake ikawa kama matone ya damu yakidondoka nchini.’  Hii ni damu iliyomwagika pale msalabani Getsemani. Ni kwa sababu Yesu alikuwa akiomba kwa kumaanisha akizibeba dhambi zetu. Hii ndio damu iliyotuondolea mapigo juu yetu. Hii ni damu inayoleta Kibali kwa sababu Uso ndio sehemu inayomtambulisha mtu katikati ya wanadamu. Hii ndio damu inayonena kung’aa, kukubalika, kupendelewa na kupokea fulsa. Waebrania 9: 29 Imeandikwa, ‘Na katika Torati karibu vitu vyote husafishwa kwa damu, na pasipo kumwaga damu hakuna ondoleo.’ Hii ndio damu iliyomwagika ili kutupatanisha na Mungu. Kumbe tukipatanishwa na Mungu basi tunakubalika hata kwa wanadamu.

Platform ministry wakiongoza kusifu na kuabudu

Damu ya Miguuni.

Luka 10:19 Imeandikwa ‘ Tazama, nimewapa amri ya kukanyaga nyoka na nge, na nguvu zote za yule adui, wala hakuna kitu kitakachowadhuru.’ Hii ilimwagika baada ya kupigiliwa misumali miguuni. Hii ni damu iliyomwagika ili kutupa uweza wa kuzikanyaga falme za giza.  Kama damu ya Yesu inanena mema basi ipo damu inayonena mabaya juu yako. Kwa kawaida damu ikinena mabaya basi mashetani ufuatilia na kutenda mabaya katika maisha yako. Kwanini watu wanashida, wamekwama kibiashara, hasara, matatizo, ni kwa sababu wapo waliotoa damu kwa waganga na hata sasa inanea icho kinachokukabili leo maishani mwako. Ufunuo 12:11 Imeandikwa, ‘Nao wakamshinda kwa damu ya MwanaKondoo, na kwa neno la ushuhuda wao; ambao hawakupenda maisha yao hata kufa.’ Sasa nenda kwa damu ya mwanakondoo na uzinyamazishe kafara zote zinazonena mabaya kwenye ulimwengu wa rohoni. Damu ya Yesu inatupa uweza wa kupambana na nguvu za shetani na kupokea ushindi kamili. Nguvu ya damu ya Yesu haijalishi mashetani hao ni wa ngazi gani. Hapa duniani wapo mashetani wa aina nne. Majini ni mashetani wanaotegemea sana mila za Kiharabu. Majoka hawa ni wale wenye asili ya nyoka, wakimng’ata mtu umwchia sumu ya uharibifu. Majoka ndio Miungu wanao abudiwa katika maeneo mbalimbali duniani. Mizimu ni mashetani ambao ni roho za watu waliokufa zamani ambao hawakuwa katika Kristo. Na mapepo ni wale malaika walioasi pamoja na shetani wakatupwa shimoni.

Baadhi ya wachungaji kutoka jimbo la Morogoro

Kwa kawaida shetani anatenda kazi kuptia mashetani. Ili mapepo au majini watende kazi lazima wapewe Damu au kafara. Yaweza kuwa damu ya mwanadamu, mnyama, au ndege. Ukubwa au wingi wa damu ndio ukubwa wa tatizo. Kinacholeta madhara ni sauti ya damu iliyomwagwa. Damu ikisha mwagwa, mashetani wanakunywa ili walisimamie tatizo. Lakini leo lazima unyamazishe izo damu au kafara zao kwa DAMU YA MWANAKONDOO. Damu ya Yesu ikinyunyizwa juu ya maisha yako utamiliki, utatawala na utatiisha. Tembea na neno ili upokee ushindi wako kila mahali kwa damu ya mwanakondoo. Ufunuo 12:11 Imeandikwa, ‘Nao wakamshinda kwa damu ya MwanaKondoo, na kwa neno la ushuhuda wao; ambao hawakupenda maisha yao hata kufa.’  

========== AMEN ========

KWA MSAADA ZAIDI NA MAOMBEZI WASILIANA NASI KUPITIA:

FACEBOOK: Pastor Dr Godson Issa Zacharia

Follow us on INSTAGRAM: pastordrgodson

Follow us on YOUTUBE: pastor:dr.godson

TEL: +255 719 798778 (WhatsApp & Sms only)

BLOG: Ufufuo na Uzima Morogoro

http://ufufuonauzimamorogoro.blogspot.com/