KUJIONDOA KWENYE KITABU CHA UKOO - Semina Siku ya 8

           GLORY OF CHRIST TANZANIA CHURCH (G.C.T.C)

                 {KANISA LA UFUFUO NA UZIMA ­- MOROGORO}

                              

                              JUMAPILI: 13 AUGUST 2017

MHUBIRI:  PASTOR GODFREY MWAKYUSA (SNP-SHINYANGA)

Kitabu ni kifaa kinachotumika  kwa ajili ya kuweka kumbukumbu. Kuna aina 4 za vitabu  katika Biblia tutakavyoviangalia siku ya leo.  Kama unavyojua, mtu anapokuwa anaokoka humuomba Mungu alifute jina lake kwenye kitabu cha Hukumu, na kuliandika upya katika Kitabu cha Uzima.

Katika kitabu cha KUTOKA 32:33 neno la MUNGU linasema “Bwana akamwambia Musa, Mtu ye yote aliyenitenda dhambi ndiye nitakayemfuta katika kitabu changu.”. Ni kwamba, Mungu aliwahi kuwaandika watu katika kitabu cha mafanikio, na kwamba kupitia dhambi MUNGU huyafuta majina ya watenda dhambi humo kitabuni mwake. Kumbe sababu kubwa ya majina kufutwa ni magazaga ya  dhambi.

Kumbe KITABU CHA UZIMA kipo, na mtu anapotenda  dhambi  humfanya afutwe kwenye kitabu cha uzima. Jina la mtu likifutwa kwenye kitabu  cha uzima, huandikwa kwenye  KITABU CHA  MAUTI. Maana yake utakuwa na  roho  za  mauti kwenye kazi,  biashara, ndoa,familia,na kila ukifanyacho kinakuwa katika mfumo wa kuvunwa na mauti.

Leo lazima tukatae majina yetu kuwepo katika kitabu cha mauti kwa sababu YESU aliyetufia msalabni alikusudia majina yetu yawepo kwenye kitabu cha uzima ili biashara,ndoa, familia n.k. ziwe na uzima katika Jina la YESU.

Mauti haina nguvu kwetu, kwa kuwa imeandikwa katika 1WAKORINTHO 15:26 “Adui wa mwisho atakayebatilishwa ni mauti.”

Sasa tuangalie aina nne za vitabu kama ilivyoandikwa katika Biblia na makusudi ya kuandikwa kwa vitabu hivyo:-

1.      KITABU  CHA UZIMA

UFUNUO 3:5 Imeandikwa “Yeye ashindaye atavikwa hivyo mavazi meupe, wala sitalifuta kamwe jina lake kaika kitabu cha uzima, nami nitalikiri jina lake mbele za Baba yangu, na mbele ya malaika zake.”

Tunajifunza kuwa, kabla ya kuombewa kwa lolote, shindana kwanza. Unashindana kimwili lakini matokeo ya mashinda haya ushindi unatokea rohoni,  ndiyo maana katika WAEFESO 6:12. imeandikwa  “Kwa maana kushindana kwetu sisi si juu ya damu na nyama; bali ni juu ya falme na mamlaka, juu ya wakuu wa giza hili, juu ya majeshi ya pepo wabaya katika ulimwengu wa roho.”

 Ukishindana na Kushinda, Bwana Yesu amekiri kuwa atalikiri jina lako mbele za Baba yake wa mbinguni. Shetani hawezi kushuka na kujitaja, “mimi ndiye bwana shetani”. Atakachofanya shetani ni  kuwatumia ndugu au  watu  wa nyumbani  kwako kama ilivyoandikwa katika MATHAYO 10:36. “na adui za mtu ni wale wa nyumbani mwake.”

Watu hawa ndiyo watakuwa kikwazo kwako, kukushawishi usiende kanisani au usitoe sadaka na fungu la kumi. Lengo la ndugu zako  hawa wa karibu ni kukufanya utende dhambi na mwishowe MUNGU alifute Jina lako katika kitabu cha Uzima.

Ng’ang’ana ili  jina lako lisikosekane katika kitabu cha Uzima, kama ilivyoandikwa katika UFUNUO 13:8 “Na watu wote wakaao juu ya nchi watamsujudu, kila ambaye jina lake halikuandikwa katika kitabu cha uzima cha MwanaKondoo, aliyechinjwa tangu kuwekwa misingi ya dunia.”.

2.      KITABU CHA MEMA:

Tusomapo katika YEREMIA 51:60 “ Naye Yeremia akaandika katika kitabu habari ya mabaya yote yatakayoupata Babeli, maneno hayo yote yaliyoandikwa juu ya Babeli.”. Endapo  Yeremia aliandika ndani ya  kitabu cha habari ya mabaya,  basi ujue kuwa kitabu cha kuandika habari ya mambo mema nacho pia  kipo.

 Na pia katika YEREMIA 45:1 imeandikwa “Neno hili ndilo ambalo Yeremia, nabii, alimwambia Baruku, mwana wa Neria, alipoyaandika maneno haya katika kitabu kwa kinywa cha Yeremia, mwaka wa nne wa Yehoyakimu, mwana wa Yosia, mfalme wa Yuda, kusema..,”.

3.      KITABU CHA TAARIFA AU CHA KUMBUKUMBU.

Imeandikwa katika ESTA 2:23 “Na jambo hilo lilipochunguzwa, na hakika ikapatikana, hao wote wawili wakatundikwa juu ya mti. Hayo pia yakaandikwa katika kitabu cha taarifa mbele ya mfalme.”.

Lengo la kuyaandika matukio haya katika kitabu cha taarifa ni ili vizazi vijavyo viwe na kumbukumbu ya mambo hayo. Leo lazima tufute kumbukumbu za uovu zilizoandikwa dhidi yetu kwa Jina la YESU.

Uonapo koo  za watu fulani zikiwa na matukio ya  watu kujinyonga, au  vifo vya kufanana ujue kuwa zipo kumbukumbu za uovu uliofanyika kipindi fulani  nyuma zinafuatilia koo hizo. Zipo koo za watu ambazo watu wa familia hiyo wanakufa kwa kansa, au ajali za barabaani na wengine wa familia hiyo hiyo kufa kwa pamoja!!

 Leo amua kukataa kumbukumbu za ukoo kukufuatilia kwa Jina la Yesu.

Kuna watu walioandikwa katika kitabu cha Kumbukumbu, na pengine maisha ya ndoa yakaanza kuyumba na mifarakano kutokea.  Lakini  kila  wakati mtu wa aina hii  akiwa karibu na mume wake, atalalamika kuwa alikosea kuolewa naye. Cha ajabu mumewe akiwa mbali, mtu  wa aina hii atatamani kumuona na kukaa naye. Baadhi ya koo zenye mitambiko hata kama umeokoka, watakusihi siyo  lazima kushiriki ila utume pesa tu na wao wataendelea.

 Kile usichokijua ni kuwa, hizo pesa ulizotuma zinakuwa zinakuwakilisha katika yote wanayofanya na mashetani yao. Baadhi ya koo pia ukitokea msiba wao hunyoa nywele. Kitendo hiki huwajumuisha wanaukoo katika vitabu vya kumbukumbu na mikosi.

Leo kataa kila maagano uliyofanya  kupitia nywele au vitambaa  vya sanda kwa Jina la Yesu.

Kuna watu pengine waliwahi  kwenda kwa waganga wa kienyeji. Kwa kawaida, waganga hawa huyaandika majina katika vitabu vyao. Hata kama utakataa, tayari majina yako yapo kwa waganga leo  hii. Wengine waliacha alama za damu  zao kwa waganga wa kienyeji baada ya kukubali kuchanjwa chale.

UKIRI!!! Leo ninakataa mizimu yoyote inayonifuatilia, katika Jina la YESU, maana imeandikwa katika YAKOBO 4:7 “Basi mtiini Mungu. Mpingeni Shetani, naye atawakimbia.”, shetani uliyekaribishwa na Baba yangu au shangazi yangu, leo nakukataaa kwa Jina la YESU.

4.      KITABU CHA UKOO

Katika  MWANZO 5:1 imeandikwa “Hiki ndicho kitabu cha vizazi vya Adamu. Siku ile Mungu alipoumba mtu, kwa sura ya Mungu alimfanya;” Kwamba Adamu alikuwa na Kitabu cha  Uzazi wake.

 Kwamba ukitaka taarifa za ukoo wa Adamu lazima ukitafute kitabu cha Ukoo wa Adamu. MWANZO 10:1 “Hivi ndivyo vizazi vya wana wa Nuhu, Shemu, na Hamu, na Yafethi. Na kwao walizaliwa wana wa kiume baada ya gharika.”.

Pia katika MWANZO 9:1-2 imeandikwa “Mungu akambariki Nuhu na wanawe, akawaambia, Zaeni, mkaongezeke, mkaijaze nchi. 2. Kila mnyama wa katika nchi atawaogopa ninyi na kuwahofu, na kila ndege wa angani: pamoja na vitu vyote vilivyojaa katika ardhi, na samaki wote wa baharini; vimetiwa mikononi mwenu.”.

Baba anapobarikiwa, baraka hizi hufuatana pia na watoto wake, vivyo hivo hata kwa upande wa laana ikiwepo, ujue kuwa laana hiyo itafuatia watoto pia. Hata Yesu naye pamoja na kuwa ni MUNGU, alikuwa amendikwa katika Kitabu cha  Ukoo .

NEHEMIA 7:5 Imeandikwa, ”Mungu wangu akanitia moyoni mwangu, kwamba niwakusanye wakuu na mashehe, na watu, ili wahesabiwe kwa nasaba.  Nikakiona kitabu cha vizazi vya hao waliokwea hapo kwanza, nikaona ya kwamba imeandikwa humo;” Kuna wengine wamo kwenye vitabu ili wapotezwe. Kuna majina au watu wameandikiwa kuonewa, kuibiwa au kutaabika, na hayo yamo kwenye vitabu vya vizazi.

KUYAFUTA NILIYOANDIKIWA NA SHETANI KATIKA KITABU

Je, unaishi yale ambayo MUNGU alikuandikia uyaishi? Kumbuka kuwa MUNGU hataki kumtesa mwanadamu, kama ilivyoandikwa MAOMBOLEZO 3:33. “Maana moyo wake hapendi kuwatesa wanadamu. Wala kuwahuzunisha.” Ni budi kukataa kuishi masisha yasiyo sawa na kile alichokuandikia Mungu. Unapaswa kuyafuta maandiko ya mashetani na kuanza kuishi sawasawa na kile alichokuandikia Mungu.

Kazi alizokuja kufanya Yesu hapa dunniani pia zilikuwa zimeandikwa, hata kabla ya kuzaliwa kwake. Katika kitabu cha Nabii ISAYA 61:1 imeandikwa “Roho ya Bwana MUNGU i juu yangu; kwa sababu Bwana amenitia mafuta niwahubiri wanyenyekevu habari njema; amenituma ili kuwaganga waliovunjika moyo, kuwatangazia mateka uhuru wao, na hao waliofungwa habari za kufunguliwa kwao.”. Na pia katika MATHAYO 26:24 imeandikwa “Mwana wa Adamu aenda zake, kama alivyoandikiwa; lakini ole wake mtu yule ambaye amsaliti Mwana wa Adamu! Ingekuwa heri kwake mtu yule kama asingalizaliwa.”. Tunajifunza kuwa, maisha ya watu yanakuwa yameandikwa katika vitabu, na itategemea ni kitabu kipi jina lako limeandikwa humo.

Simeoni alikuwa naye ameahidiwa jambo fulani, na baada ya kumbariki Yesu, alienda kulala. Imeandikwa  LUKA 2:34 “Simeoni akawabariki, akamwambia Mariamu mama yake, Tazama, huyu amewekwa kwa kuanguka na kuinuka wengi walio katika Israeli, na kuwa ishara itakayonenewa.”. Tunajifunza kuwa kuna watu ambao Mungu amewaweka  kwa  ajili  ya kuinuka na  kuanguka kwa wengine. Kumbe kuna umuhimu wa kuziepuka roho za mazoea. Wayahudi hawamuamini YESU, wakidhani ni sawa tu na kaka yao.

Watu wengine wanamuons Mchungaji kiongozi wao na kumfanya wa kawaida kawaida tu, na matokeo  yake  watu wa aina hii  hawabarikiwi. Utii unaweza kumfanya mtu kufika mbali. Shetani  kilichomfanya afutwe  kwenye kile kitabu cha uzima ni kiburi chake. Biblia inasema watiini wazazi wako katika Bwana. Inamaanisha kuwa, mchungaji kiongozi wako ni Baba yako wa kiroho, hivyo ukimtii unabarikiwa na usipomtii kile  anachokuagiza unaweza kuanguka vile  vile. Vivyo hivyo,  wazazi wako wa kimwili nao vilevile ni budi  kuwatii na kuwapa mahitaji  yao, hata kama ni wanga /wachawi ili uweze kubarikiwa. Usiwalaumu kwa kuwa ni wachawi au wanga, kwa sababu imeandikwa “Kama shomoro katika kutangatanga kwake, Na kama mbayuwayu katika kuruka kwake; Kadhalika laana isiyo na sababu haimpigi mtu.” (MITHALI 26:2.).

UKIRI!!! Ninakataa jina langu kuandikwa katika kitabu  cha  laana na mikosi.  Damu ya Yesu inifunike kwa Jina la Yesu. Amen

Katika MWANZO 15:13-14 imeandikwa “Bwana akamwambia Abramu, Ujue hakika ya kwamba uzao wako utakuwa mgeni katika nchi isiyo yake, watawatumikia watu wale, nao watateswa muda wa miaka mia nne. 14 Hata na taifa lile, watakaowatumikia, nitawahukumu; baadaye watatoka na mali mengi.” Inawezekana hata wewe upo bado utumwani, lakini yupo baba (Mchungaji Kiongozi) aliyepewa silaha za kukuvusha tena kwa Jina la Yesu.

Imeandikwa pia katika KUTOKA 14:15-19 “Bwana akamwambia Musa, Mbona unanililia mimi? Waambie wana wa Israeli waendelee mbele. 16 Nawe inua fimbo yako, ukanyoshe mkono wako juu ya bahari, na kuigawanya; nao wana wa Israeli watapita kati ya bahari katika nchi kavu. 17 Nami, tazama, nitaifanya mioyo ya Wamisri kuwa migumu, nao wataingia na kuwafuatia, nami nitajipatia utukufu kwa Farao, na kwa jeshi lake lote, kwa magari yake na kwa wapanda farasi wake. 18 Na Wamisri watajua ya kuwa mimi ndimi Bwana, nitakapokwisha kujipatia utukufu kwa Farao, na magari yake, na farasi zake. 19 Kisha malaika wa Mungu, aliyetangulia mbele ya jeshi la Israeli, akaondoka akaenda nyuma yao; na ile nguzo ya wingu ikaondoka hapo mbele yao, ikasimama nyuma yao”.

Katika KUTOKA 14:24-23 imeandikwa “Ikawa katika zamu ya alfajiri, Bwana akalichungulia jeshi la Wamisri katika ile nguzo ya moto na ya wingu, akalifadhaisha jeshi la Wamisri. 25 Akayaondoa magurudumu ya magari yao, hata yakaenda kwa uzito; na Wamisri wakasema, Na tukimbie mbele ya Israeli; kwa kuwa Bwana anawapigania, kinyume cha Wamisri.”. Kumbe Mungu huwa anachungulia adui zetu. Kilichowaponza Wamisri ni kuwa nao walidhani Mungu amewaandika katika Kitabu chake.

Kuna mtu ambaye hujawahi kumpokea Yesu Kristo kuwa Bwana na Mwokozi, binafsi katika  maisha yako, hata kama unaenda kanisani lakini hujamkiri Yesu ujue leo ni  siku muhimu kufanya maamuzi ya kuokoka sasa, kwa kuwa imeandikwa “Kuomba kwake mwenye haki kwafaa sana, akiomba kwa bidii.” (YAKOBO 5:16).  Ni vyema leo uokoke kwanza ili  kuomba kwako kwa bidii kukubalike mbele za MUNGU  katika Jina la  YESU.

                                    ======== AMEN ========

KWA MSAADA ZAIDI NA MAOMBEZI WASILIANA NASI KUPITIA:

FACEBOOK: Pastor Dr Godson Issa Zacharia

Follow us on INSTAGRAM: pastordrgodson

Follow us on YOUTUBE: pastor:dr.godson

TEL: +255 719 798778 (WhatsApp & Sms only)

BLOG: Ufufuo na Uzima Morogoro http://ufufuonauzimamorogoro.blogspot.com/