SOMO: MADHABAHU IMEPASUKA-Na: Dr. Godson Issa Zacharia (SNP).

Utangulizi: Somo la Ibada ya leo linaitwa “Madhabahu Imepasuka”. Neno madhabahu ni daraja linalounganisha ulimwengu  wa mwili na ule ulimwengu wa roho. Wanadamu  wote tunaishi katika ulimwengu wa vitu vinavyoonekana,  ambao  ni  ulimwengu wa mwili. Upo pia ulimwengu wa roho ambao ni ulimwengu  wa vitu visivyoonekana.

SNP (Dr. Godson) akichambua maandiko leo 19/10/2014

Ulimwengu wa vitu visivyoonekana ndio uliosababisha ulimwengu wa vitu vinavyoonekana. Wakazi wa ulimwengu usionekana hawawezi kuonekana kwa macho ya kawaida, si kwa sababu ni wadogo, la hasha!!. Dunia na vyote vyenye kuonnekana vimetokea kutokana na ulimwengu ule usioonekana. Mungu (ambaye ni roho) ndivyo alivyoumba dunia na viumbe vyote kwa njia hii, kwa neno lake.

MWANZO 1:1-27... Utaona Mungu alitamka tu maneno, na ikawa hivyo jinsi alivyotamka.  Mungu alianzia na yasiyoonekana na kufanya kuwepo kwa vinavyoonekana. Ulimwengu wa roho una viumbe wake ambao hatujawahi kuwaona kwa macho, ni  kama vile, Mungu, malaika watakatifu, malaika wachafu, mashetani n.k.

Matukio yote yanayotokea katika ulimwengu wa mwili yanakuwa na asili yake kutokea kwenye ulimwengu wa roho. Mungu (kwa sababu ni roho) akitaka kukuletea Baraka wewe huhitaji DARAJA ambalo  Mungu atalitumia kukufikia.  Daraja hili ndilo huitwa MADHABAHU. Madhabahu huwepo ili pasiwepo kizuizi cha mtu na Mungu katika kufanya mawasiliano. Mawakala wa Mungu ni kama wachungaji ambao husimama katika madhabahu za Mungu kuleta ujumbe wa Mungu maishani  mwa mtu. Madhabahu za Mungu humsogeza Mungu sana karibu na watu wake.

Vivyo hivyo, kanuni  hii pia hutumiwa na shetani (kwa sababu shetani ni  roho) kuweza kuingia hapa duniani na kufanya kazi zake za uharibifu.  Shetani anahitaji daraja la kumfanya aingie katika mipango  ya maisha yako.  Shetani  haji hapa duniani ili  kukuletea Baraka maishani mwako. Imeandikwa  katika YOHANA 10:10… [Mwivi haji ila aibe na kuchinja na kuharibu; mimi nalikuja ili wawe na uzima, kisha wawe nao tele.]…. Shetani ili  aweze kufanikisha uharibifu huu, anahitaji Madhabahu.   Shetani naye anao  mawakala wake ambao ni wachawi, waganga wa kienyeji, wasoma nyota n.k . ambao nao kazi zao ni kuleta uharibifu maishani mwa watu. Madhabahu za shetani humsogeza mtu karibu na shetani.

Katika Biblia madhabahu ziliwahi kujengwa. Wafuatao walijenga madhabahu kwa ajili ya Bwana:-

• NUHU: Mwanzo 8:20...[Nuhu akamjengea Bwana madhabahu; akatwaa katika kila mnyama aliye safi, na katika kila ndege aliye safi, akavitoa sadaka za kuteketezwa juu ya madhabahu.]

• MUSA:  Kutoka 17:15 ..[Musa akajenga madhabahu, akaiita jina lake Yehova-nisi* (Yehova-nisi maana yake ni Bwana ni bendera yangu); akasema, Bwana ameapa; Bwana atakuwa na vita na Amaleki kizazi baada ya kizazi.]...

• IBRAHIMU:  Mwanzo 12:7..[Bwana akamtokea Abramu, akasema, Uzao wako nitawapa nchi hii. Naye huko akamjengea madhabahu Bwana aliyemtokea.]...

Baadhi ya Majeshi ya Bwana wakifuatillia kwa makini somo la wiki hii (Madhabahu Imepasuka)  kama ambavyo
Baba (SNP Dr. Godson) alivyokuwa akihubiri katika Nyumba ya Ufufuo na Uzima - Morogoro, tarehe 19/10/2014.

KWA NINI TUNAOMBA ILI  MADHABAHU HIZI ZIPASUKE?

Kwa sababu shetani ndiye 'mungu wa madhabahu za uharibifu'. Ikumbukwe kuwa, ndani  ya madhabahu mipango ya Baraka au  Uharibifu hufanyika.

Katika kila madhabahu, yupo KUHANI wa madhabahu. Huyu hukaa katikati  kuunganisha pande zote mbili. Endapo umekuwa unaombewa kanisani,  na ukeshapata nafuu hali ile ya zamani inakurudia tena,  ujue  kuna kuhani wa madhabahu anayesimamia hali yako hiyo.

Madhabahu inayo KAFARA, ambayo ni chakula cha madhabahu. Kwetu sisi wakristo,  hatuna haja tena ya kutoa sadaka za wanyama ili  kuwa kafara kwa sababu YESU Kristo tayari alifanyika Kafara ya mwisho. 


Kinachotokea kwa mtu amabaye anaombewa na hali yake ya zamani kumrudia tena ni kuwa, wachawi huongeza nguvu kwa kutoa kafara nyingine kubwa kuliko ile ya awali. Matokeo yake ni kuwa mtu anarudiwa na hali yake ya zamani, na anapokuja kuombewa tena kafara ya Bwana Yesu hufanya kazi  upya tena. Sadaka ya Madhabahu husababisha NGUVU ya Madhabau kuongezeka.  


Wachawi wanapoona shida yako imeisha kwa sababu ya maombi yako, huongeza sadaka,  na hata ile shida ambayo ilikuwa imeondoka humrudia  huyo mtu tena. Pengine mtu alikuwa anaumwa mguu, na sadaka iliyokuwa imetolewa ni njiwa. Wachawi huongeza ukubwa wa sadaka, pengine mara hii wakamtoa ng’ombe, na ile  shida ya mguu  huongezeka na kuwa siyo mguu tu,  bali pamoja na mgongo. Katika  vikao vyao,  wachawi hujadiliana ni sadaka ya aina ipi itafuatia endapo mguu na mgongo wake mtu huyu vitaponywa  kutokana na maombi. Ndiposa wachawi  huamua kutoa 'sadaka ya mtu'.

Hata hivyo,  hata kama wachawi watatoa sadaka za mamia ya watu,  hazitaweza kuizidi ile kafara ya YESU, kwa sababu "Yesu alikuwa mtakatifu",  hakuwa na dhambi. Hata kama wachawi watasababisha ajali na kuua watu wote kwenye basi,  hizo bado ni sadaka za watenda dhambi, walevi, wezi n.k. ambazo haziwezi kulinganishwa na ile kafara ya Bwana Yesu Kristo ya pale msalabani.

Leo tunaifuata hiyo madhabahu na kuipasua ili  isiwepo  kabisa kwa Jina la Yesu. Madhabahu hizi zikeshapasuka, wachawi  hawatakaa waione tena madhabahu yao ya uharibifu. Mfano mzuri: Ukitaka kuzuia au kumaliza magari yote ya 'Toyota' hapa duniani kote, itakuwa kazi bure kuanza kukusanya na kuharibu magari ya Toyota dunia nzima. Cha kufanya ni kupanda ndege na kupasua pasua mitambo yote ya magari haya kule kule Japan. Leo tuna kazi moja tu ya  kufanya. Kazi yenyewe ni kupasua madhabahu za shetani.

Baadhi ya watu waliosalimisha maisha kwa Bwana Yesu siku ya leo 19/10/2014 kwa kuokoka.

Yupo  Mfalme aliyewahi kujenga madhabahu za kuwatesa wana wa Israeli,  jina lake ni Yeroboamu. Imeandikwa:

1 WAFALME 12:25-27 …[Ndipo Yeroboamu akajenga Shekemu katika milima ya Efraimu, akakaa huko. Akatoka huko akajenga Penueli. 26 Yeroboamu akasema moyoni mwake, Basi ufalme utairudia nyumba ya Daudi. 27 Kama watu hawa wakipanda kwenda kutoa dhabihu katika nyumba ya Bwana huko Yerusalemu, ndipo mioyo ya watu hawa itamrudia bwana wao, yaani Rehoboamu, mfalme wa Yuda; nao wataniua mimi, na kumrudia Rehoboamu, mfalme wa Yuda. 28 Kwa hiyo mfalme akafanya shauri, akafanyiza ng'ombe wawili wa dhahabu, akawaambia watu, Ni vigumu kwenu kupanda kwenda Yerusalemu; tazama, hii ndiyo miungu yenu, enyi Israeli, iliyowapandisha kutoka nchi ya Misri. 29 Akamweka mmoja katika Betheli, na wa pili akamweka katika Dani. 30 Jambo hili likawa dhambi, maana watu walikwenda kuabudu mbele ya kila mmoja, hata huko Dani. 31 Tena akafanya nyumba za mahali pa juu, akafanya na watu wo wote, watu wasio wa wana wa Lawi, kuwa makuhani. 32 Yeroboamu akaamuru kushika sikukuu katika mwezi wa nane, siku ya kumi na tano ya mwezi, mfano wa sikukuu iliyokuwa katika Yuda, akapanda juu ili kuiendea madhabahu. Akafanya vivyo katika Betheli akiwatolea dhabihu wale ng'ombe aliowafanya; akawaweka katika Betheli wale makuhani wa mahali pa juu alipokuwa amepafanya. 33 Akatoa dhabihu juu ya ile madhabahu aliyoifanya katika Betheli, siku ya kumi na tano ya mwezi wa nane, mwezi aliouwaza moyoni mwake mwenyewe; akawaamuru wana wa Israeli waishike sikukuu hiyo, akapanda kuiendea madhabahu, ili kufukiza uvumba.]… Yeroboamu alibaini  kuwa endapo wana wa Israeli wataendelea kwenda Yerusalemu kuomba watakuja baadae kumuua, na kutafakari cha kufanya,  kwa kutengeneza 'miungu wawili wa dhahabu'. Kwa nini alitumia dhahabu" Alitumia dhahabu kwa sababu ni madini yanayotamaniwa sana na watu,  tena yenye thamani.  Madhabahu hii ilisababisha chukizo kwa Mungu, na kitendo cha watu  kuiabudu miungu hii, matatizo yao  ya awali yakawarudia upya kwa sababu walimuacha Mungu wa ukweli.

MAOMBI: Leo, tunazipasua madhabahu, zilizotengenezwa kwa mikono ya waovu, kwa Jina la Yesu. Amen

1 WAFALME 13:1-10…[Na tazama, akatoka mtu wa Mungu katika Yuda kwa neno la Bwana, akafika Betheli. Naye Yeroboamu alikuwa akisimama penye madhabahu, afukize uvumba. 2 Basi mtu huyo akapiga kelele juu ya madhabahu, kwa neno la Bwana akasema, Ee madhabahu, madhabahu, Bwana asema hivi, Angalia, mtoto atazaliwa katika nyumba ya Daudi, jina lake Yosia; na juu yako atawachinja makuhani wa mahali pa juu, wanaofukiza uvumba juu yako, na mifupa ya watu itateketezwa juu yako. 3 Akatoa ishara siku ile ile, akasema, Hii ndiyo ishara aliyoinena Bwana, Tazama, madhabahu itapasuka, na majivu yaliyo juu yake yatamwagika. 4 Ikawa, mfalme Yeroboamu alipoyasikia maneno ya yule mtu wa Mungu, alipopiga kelele juu ya madhabahu huko Betheli, alinyosha mkono wake pale madhabahuni, akasema, Mkamateni. Basi ule mkono wake aliounyosha ukakatika, wala hakuweza kuurudisha kwake tena]…. Kunyoosha mkono kwa huyu mfalme ni sawa na kitendo cha wachawi wanapotamani kukuadhibu wewe unapoomba kinyume nao.

MAOMBI: Ninaamuru kwa Jina la Yesu, wanaokunyooshea mateso mikono yao ikatike kwa Jina la Yesu, wanaokunyooshea taabu mikono yao ikatike kwa Jina la Yesu, wanaokunyooshea shida,  mikono yao  ikatike kwa Jina la Yesu.  Amen

1 WAFALME 13:5-6…[Madhabahu ikapasuka, majivu ya madhabahuni yakamwagika, sawasawa na ishara aliyoitoa mtu wa Mungu kwa neno la Bwana. 6 Mfalme akajibu, akamwambia yule mtu wa Mungu, Umsihi sasa Bwana, Mungu wako, ukaniombee, ili nirudishiwe mkono wangu tena. Yule mtu wa Mungu akamwomba Bwana mkono wa mfalme ukarudishwa tena, ukawa kama ulivyokuwa kwanza.]… Ukitaka kumkamata aliyetumwa utakatika mkono. Ukitaka kumkamata mchungaji utakatika mkono. Ukitaka kumkamata RP utakatika mkono. Ukitaka kumkamata AP utakatika mkono. Ukitaka kumkamata MP utakatika mkono. Ukitaka kumkamata Shepherd utakatika mkono. Ukitaka kumkamata MP utakatika mkono. Ukitaka kumkamata Shepherd utakatika mkono. Ukitaka kumkamata Shepherd on Training utakatika mkono. Ukitaka kumkamata Potential Shepherd utakatika mkono.

Leo tunaiweka adhabu.  Wale wale waliokutesa waje na kuomba ili uwaombee‼  Lazima wafike mahali  pa kujua kuwa, madhabhu zikeshapasuka, mikono  yao haitaweza kurudishwa na wachawi wenzao tena.  Kama madhabahu hii isinekuwa imepasuka, mfalme huyu  angeendelea na kiburi chake.

Musa alikumbana na kisa cha madhabahu  za kichawi kama hizi. Alipotengeneza nyoka, Farao na wachawi wake wote walitengeneza vijoka vyao tena vingi. Kila muujiza ambao Musa aliufanya mbele ya  Farao,  wachawi wake nao waliufanya vivyo hivyo. Mungu alipoona kuwa 'tegemeo la hawa watu' ni  wazaliwa wao  wa kwanza ambao huwatumia  kwenye kafara zao  za kichawi,  basi aliamuru kuua kila mzaliwa  wa kwanza wa Misri ili pasiwepo tena sadaka ya  madhabahu zao za kutumia wazaliwa wao wa kwanza!!.

Mtoto aitwae Fatuma (8) akihojiwa na Baba (SNP Dr. Godson)
kuhusu kazi za uchawi alizokuwa akitumikishwa kwa
miaka minne hadi alipodondoshwa chini na ungo wiki hii
(Fuatilia Ushuhuda huu kwenye hii Blog)

Madhabahu inayoleta uharibifu kwako ni muhimu ipasuke siku ya leo. Usikubali uingie nyumbani  mwa Bwana na kurudi nyumbani  kwako na ile madhabahu inayotengeneza shida yako kila wakati.

Leo tunataka mtunza madhaabhu aone jinsi hiyo madhabahu inavyopasuka. Kumbuka kwamba, imeandikwa kuwa “Hamjui kuwa miili yenu ni mahekaluya roho mtakatifu?” Endapo mtu ni  mtenda dhambi, Mungu hutoka ndani mwake, na badala yake wachawi huweka kituo ndani ya mwili  wa mtu huyo kwa njia ya roho  za mashetani. 

MAOMBI: Asante Bwana Yesu kwa kuniwezesha kuweko nyumbani  mwako leo. Asante Yesu kwa kuniokoa  siku  ya leo. Amen

© Information Ministry (Ufufuo Na Uzima - Morogoro)

Kihonda VETA, Morogoro.

 /or

Contact our Senior Pastor:

 Dr. Godson Issa Zacharia

 (Ufufuo Na Uzima – Morogoro) 

 Cellphone: (+255) 757 550878 / +255 719798778