Somo: MAGEREZA YA KICHAWI

GLORY OF CHRIST TANZANIA CHURCH

UFUFUO NA UZIMA - MOROGORO

JUMAPILI:  31 JULY 2016

 

Na: STEVEN NAMPUNJU (RP - MOROGORO)

RP Steven akifundisha kuhusu "Magereza ya Kichawi" Jumapili 31/7/2016
Katika Nyumba Ya Ufufuo na Uzima - Bonde la Maono Mkundi (Morogoro)

 

 

Magereza ni sehemu au  makao ya wafungwa ambako wanaishi. Wapo watu wamepindishiwa maisha yao kwa sababu tu ya kuwekwa katika magereza. Yumkini unaishi jinsi ulivyo lakini sivyo ungependelea kuishi. Unatamani kula vitu vyenye ladha ya sukari lakini gereza la Kisukari linakuzuia kula vitu hivyo. Kuna maisha fulani unayatamani uishi lakini umejikuta unaishi ndivyo sivyo. Chanzo cha yote haya ni magereza. Na magereza haya yapo ya aina mbili: Magereza ya mwilini na Magereza ya rohoni. Je, yale uliyokuwa unayatafuta miaka mingi iliyopita umeshayapata? Kama bado  ujue lipo gereza ambalo limefungia vitu vyako ulivyomuomba Bwana. Leo tutashughulika na magereza yote ya rohoni na kuwaweka watu  huru kwa Jina la Yesu.

 

 

Katika WARUMI 7:21-25 Imeandikwa.....(Basi nimeona sheria hii, ya kuwa kwangu mimi nitakaye kutenda lililo jema, lipo lililo baya. 22 Kwa maana naifurahia sheria ya Mungu kwa utu wa ndani, 23 lakini katika viungo vyangu naona sheria iliyo mbali, inapiga vita na ile sheria ya akili zangu, na kunifanya mateka ya ile sheria ya dhambi iliyo katika viungo vyangu. 24 Ole wangu, maskini mimi! Ni nani atakayeniokoa na mwili huu wa mauti? 25 Namshukuru Mungu, kwa Yesu Kristo Bwana wetu. Basi, kama ni hivyo, mimi mwenyewe kwa akili zangu naitumikia sheria ya Mungu, bali kwa mwili wangu sheria ya dhambi.). Kwa maandiko haya tunaziona sheria za aina mbili zikitajwa: 

1.      Sheria ya mauti na

2.      Sheria ya uzima (Sheria ya Mungu).

 

Wapo watu kama akina Paulo ni wale ambao moyoni wanasikia furaha lakini mwilini hakuna furaha. Kwa kawaida, mfungwa hana uwezo wa kuchagua chochote kile akiwa gerezani. Gereza na mkuu wa gereza ndiyo wanaoamua mfungwa ale nini au alale saa ngapi. Silaha kubwa anayoitumia shetani ni kuwaweka watu katika magereza. Magereza yapo  ya aina nyingi sana. Haya yaweza kuwa ni magereza ya umaskini, magereza ya magonjwa, magereza ya njaa, magereza ya utasa n.k. Hapo ndipo shetani anawaamulia wafungwa wake kwamba leo wale nini nini au waishi vipi na wapi.

 

 

Imeandikwa katika ISAYA 42:22....(Lakini watu hawa ni watu walioibiwa na kutekwa; wote wamenaswa katika mashimo, wamefichwa katika magereza; wamekuwa mawindo, wala hapana aokoaye; wamekuwa mateka, wala hapana asemaye, Rudisha.). maandiko yansema “Wamefichwa katika “magereza”, siyo “gereza moja”. Yapo magereza ya magonjwa, utasa, umaskini n.k.. Endapo mtu haujawekwa kwenye gereza mojawapo, utakuwa umewekwa katika gereza la aina nyinginne.

 

Mafuriko ya watendakazi wa Ufufuo na Uzima Morogoro - Bonde la  Maono - Mkundi wakimwabudu Bwana Yesu Jumapili 31/7/2016

 

Magerezani ni mahali ambako watu waliofungwa huwekwa ili kutumikia vifungo au adhabu zao kwa muda uliopangwa. Pengine ni kuendana na kosa ulilolifanya. Hauwekwi gerezani bila kuwa na kosa. Askari wa kiroho hutumwa na kuwatia watuhumiwa magerezani kwa muda uliopangwa.

 

 

Wapo watu wengine husema “huu ni mwaka sasa umepita bado ugonjwa wangu unaendelea”. Wengine hufungwa magerezani kwa miezi sita, wengine miaka miwili au zaidi n.k. Wengeine hukumu zao ni kufungwa gerezani na mwanzoni kuchapwa viboko wakati wa kuingia na viboko vingine wakati wakutoka. Ndiyo maana wapo mtu wa aina hii akikumbuka jinsi shida yake ilivyoanza, ni kwamba yalikuwepo matukio ya mikosi au  misiba mfululizo nyakati fulani, shida zikaendelea na mwishowe balaa au msiba mingine ikatokea tena kabla ya tatizo hilo kuisha.

 

 

Wapo wengine wamehukumiwa vifungo vya maisha. Maana yake mtu amehukumiwa afe na shida aliyokuwa nayo. Leo hii tunaye Mungu wetu ambaye ni  Mungu wa kuokoa tutaingia katika gereza lako na kukutoa humo  kwa Jina la Yesu.

 

 

Yesu yule yule aliyetembelea gereza la Petro na kumtoa leo atawatoa wote walioshokiliwa magerezani kwa Jina la Yesu. Samsoni aliwahi kuwekwa gerezani na kutumikishwa kazi ya kusaga ngano. Katika WAAMUZI 16:23-24 Imeandikwa...(Kisha wakuu wa Wafilisti wakakusanyika ili kumtolea sadaka Dagoni mungu wao, na kufurahi; maana walisema, Mungu wetu amemtia Samsoni adui wetu mikononi mwetu. 24 Na hao watu walipomwona wakamhimidi mungu wao, maana walisema, Mungu wetu amemtia mikononi mwetu huyu adui wetu, aliyeiharibu nchi yetu na kuwaua watu wengi miongoni mwetu.)... Shetani anatumia silaha ya kutoboa macho ili wewe usione msaada hata kwa wenye kutaka kukusaidia. Wanajua Samsoni anaweza kuokota angalau hata jiwe akawaua wengi kama kipindi kile alichotumia taya kama silaha na kuangamiza maelfu ya adui zake.

 

 

UKIRI Leo Ninataka macho yangu kwa Jina la Yesu. Wewe uliyeniweka katika gereza la kutokuona fursa maishani mwangu niachie kwa Jina la Yesu. Amen

 

Platform wa Ufufuo na Uzima - Bonde la Maono Mkundi Morogoro wakiongoza
Watendakazi kwa Nyimbo za Kusifu na Kumwabudu Bwana Yesu Jumapili 31/7/2016.

 
 

Imeandikwa katika WAAMUZI 16:25-26.... (Ikawa mioyo yao iliposhangilia, wakasema, Mwiteni Samsoni, ili atufanyie michezo. Basi wakamwita Samsoni atoke gerezani, akacheze mbele yao wakamweka katikati ya nguzo mbili. 26 Samsoni akamwambia yule kijana aliyemshika mkono, Niache nizipapase nguzo ambazo nyumba hii inazikalia, nipate kuzitegemea.). Ukeshawekwa gerezani unawekewa na watu wa kukushika mikono. Leo tutazikamata nguzo zile ambazo magonjwa yako yanazitegemea na kuwa huru kwa Jina la Yesu. Hata hivyo tutawalazimisha vijana / watu wale wanaokushika wakuache huru kwanza kwa Jina la Yesu.  Mtu yeyote aliyekuweka gerezani anazo nguzo anazozitegemea. Pengine ni hirizi,pengine ni majini yake n.k. na ikiwa ni waganga wa kienyeji, leo wote tutawafyeka na kuwaangamiza kwa Jina la Yesu.

 

 

Yesu alimponya yule mama siku ya Sabato, lakini wakuu wa makuhani (Dini) walimkemea yule mama kwa sababu amepata uponyaji siku  ya Sabato. Kwamba zipo  siku 6 za kupata uponyaji, na siku ya 7 ni Sabato. Hata hivyo, siku ya kutoka katika gereza ni siku yoyote bila kujali ni sabato au la katika Jina la Yesu.

 

 

Imeandikwa katika YOHANA 8:34...(Yesu akawajibu, Amin, amin, nawaambia, Kila atendaye dhambi ni mtumwa wa dhambi.). Mtenda dhambi ni mtumwa wa dhambi (maana nyingine ni kuwa mtenda dhambi ni mfungwa wa dhambi katika ulimwengu wa roho). Unapotenda dhambi unajiingiza mwenyewe katika gereza mara moja, na kifungo  hiki chaweza kuwa cha maisha au cha  muda fulani.

 

 

Imeandikwa katika ZABURI 103:3-4...(Akusamehe maovu yako yote, Akuponya magonjwa yako yote, 4 Aukomboa uhai wako na kaburi, Akutia taji ya fadhili na rehema,)...Ili Mungu amkomboe mtu na kaburi atamsamehe maovu yake yote, na pili atamponya magonjwa yake yote. Shetani humfanya mtu atende dhambi ili kifungo  cha magonjwa yake kiendelee siku zote.

 

 

Katika LUKA 4:18 Imeandikwa....(Roho wa Bwana yu juu yangu, Kwa maana amenitia mafuta kuwahubiri maskini habari njema. Amenituma kuwatangazia wafungwa kufunguliwa kwao,  Na vipofu kupata kuona tena, Kuwaacha huru waliosetwa.). Yesu alipoumaliza ule mfungo wake wa siku 40, na kutangaza rasmi kazi yake, alianza kwa kusema macho ya vipofu yafunguliwe tena ili waone. Ni kama yale yaliyotokea kwa Samsoni. Macho yakeshatobolewa huwezi kuona fursa zozote wala hatima yako siyo  rahisi kufanikiwa.

 

 

Ili utoke ndani ya gereza ni lazima upaze sauti yako kwa Bwana.

 

1.   Barthmayo alikuwa gereza la upofu,  na aliposikia habari za Yesu kuwa anapita mahali pale ilimbidi apaze sauti yake. Ingawa wapo watu waliokuwa katika msafara na Yesu, ambao walimkazia macho kumkataza, lakini Barthmayo hakunyamaza. Hata wewe, magonjwa yakija kwako usinyamaze, umaskini ukija kwako usinyamaze kimya.

 

 

2.   Petro alipowekwa gerezani yeye alikaa kimya, akakubali kunyamaza. Hata hivyo Kanisa (wapendwa) waliokuwa nje walifululiza maombi bila kuacha kunyamaza,  hadi Petro akachiwa huru. Wapo watu wanaovunjika moyo wakeshayaona magereza yao ya HIV/AIDS na hata kusema hapa hakuna uponyaji, au wakipatwa Kisukari, au BP, Umaskini, Ndoa kukosa amani n.k.

 

 

3.   Paulo na Sila kwa upande wao walikuwa gerezani lakini hawakukubali kukaa kimya. Wafungwa wenzao waliwashangaa kwa nini wanaimba mapambio ya kumsifu  Mungu wakati wapo katika taabu za gerezani. Wapo watu wanalala njaa, hawana fedha, hawana viatu, hawana afya lakini bado wanamsifu Mungu, wanaenda makanisani wakati wengine wakiwaona wanashangaa‼ Kilichotokea ni Paulo na Sila kuachiwa huru na wafungwa wenzao ambao hawakuwaunga mkono katika kusifu, walibaki gerezani.

 

 

4.   Shedraki, Meshaki na Abednego waliwekwa katika gereza, na moto ukaandaliwa wakatupwa ndani ya tanuru ya moto. Wao waliendelea kuomba na kusifu, na moto haukuwadhuru kamwe kwa Jina la Yesu. Mfalme alipokuja alishangaa kuona kuwa ndani ya tanuru wapo watu  wanne badala ya watu watatu waliotupwa mle.  Ili uweze kumstaajabisha mfalme, uskiubali kukaa kimya.

.

 

 

RP Steven na Watendakazi wa Ufufuo na Uzima - Bonde la Maono Morogoro
wakiombea watu mbalimbali waliokuwa kwenye Magereza ya Kichawi Jumapili 31/7/2016. 

 

Imeandikwa katika LUKA 5:17-25...(Ikawa siku zile mojawapo alikuwa akifundisha, na Mafarisayo na waalimu wa torati walikuwa wameketi hapo, waliotoka katika kila kijiji cha Galilaya, na Uyahudi, na Yerusalemu; na uweza wa Bwana ulikuwapo apate kuponya. 18 Na tazama, wakaja watu wanamchukua kitandani mtu mwenye kupooza; wakataka kumpeleka ndani na kumweka mbele yake. 19 Hata walipokosa nafasi ya kumpeleka ndani kwa ajili ya lile kundi la watu, walipanda juu ya dari wakampisha katika matofali ya juu, wakamshusha yeye na kitanda chake katikati mbele ya Yesu. 20 Naye alipoiona imani yao, alimwambia, Ee rafiki, umesamehewa dhambi zako. 21 Basi, wale waandishi na Mafarisayo wakaanza kuhojiana wakisema, Ni nani huyu asemaye maneno ya kukufuru? N'nani awezaye kusamehe dhambi isipokuwa Mungu peke yake? 22 Na Yesu alijua hoja zao, akajibu akawaambia, Mnahojiana nini mioyoni mwenu? 23 Lililo jepesi ni lipi? Kusema, Umesamehewa dhambi zako, au kusema, Ondoka, uende?  24 Lakini, mpate kujua ya kwamba Mwana wa Adamu anayo amri duniani ya kusamehe dhambi, (alimwambia yule mwenye kupooza). Nakuambia, Ondoka, ujitwike kitanda chako, ukaende zako nyumbani kwako. 25 Mara hiyo akasimama mbele yao, akajitwika kile alichokilalia, akaenda zake nyumbani kwake, huku akimtukuza Mungu.).. Kutoka gerezani inabidi uwe na juhudi binafsi. Ukisema ufuate utaratibu wa kibinadamu utaendelea kubaki gerezani.

 

 

Hao marafiki zako ndiyo waliokufanya uwe jinsi ulivyo. Kuwa makini na marafiki zako, kwa sababu wengine mara yao ya kwanza kupelekwa kwa waganga wa kienyeji ilikuwa kwa kupitia marafiki zao. Magereza mengine ni “mavazi ya aibu”, ambayo watu huyavaa na hayasitiri miili ya wale wanayoyavaa. Endapo ukimuona mfungwa amevaa mavazi  yake usidhani huwa anayafurahia. Mfungwa hulazimika kuvaa hayo mavazi kwa sababu mkuu wa gereza kalazimisha avae hivyo. Vivyo  hivyo, wapo wakuu wa magereza ya kusabisha watu kuvaa mavazi ya aibu,  kwa vijana wa kiume na kike.

 

 

Katika YEEMIA 52:33 Imeandikwa....(Naye akabadili mavazi yake ya gerezani, akala chakula mbele yake daima, siku zote za maisha yake.). Ni sharti  ubadilishe hayo mavazi ili ijulikane wazi kuwa wewe siyo mfungwa tena, kwa sababu ukiendelea kuyavaa bado watu watakudhania wewe bado ni  mfungwa. Imeandikwa katika 2WAFALME 25:29...(naye akambadilishia mavazi yake ya gerezani, akala chakula mbele yake daima, siku zote za maisha yake.). Huwezi kula chakula mbele ya Yesu hadi ubadilishe mavazi ya magerezani. Biblia inasema sisi ni barua. Endapo unaenda kushuhudia haushuhudii rohoni bali  mwilini.

 

 

Imeandikwa katika KUMBUKUMBU 21:13...(avue na mavazi ya uteka wake akae nyumbani mwako, awakalie matanga babaye na mamaye mwezi mzima, kisha uingie kwake uwe mumewe, naye awe mkeo.)... Kumbe yapo “Mavazi ya uteka”. Mavazi hutoa tafsiri halisi, kuwa huyu mtu ni nani. Vazi la mtu laweza kumtambulisha kama yeye ni hakimu, mchungaji, Sspika wa Bunge, askari polisi, mwanajeshi au raia.

 

 

Hata hivyo, wapo waliotupwa magerezani na kuandikiwa  kufa. Imeandikwa katika ZABURI 102:20....(Ili akusikie kuugua kwake aliyefungwa, Na kuwafungua walioandikiwa kufa.).. Mungu aweza kuwasikia wenye kuugua. Na wapo watu shida zao zitaishia kwenye kifo, kwa sababu tayari wameandikiwa hivyo na mkuu wa gereza. Leo tukatae kukaa magerezani kwa Jina la Yesu.

 

 

Imeandikwa katika ISAYA 14:17....(Aliyeufanya ulimwengu ukiwa, akaipindua miji yake; Asiyewafungua wafungwa wake waende kwao?). Familia zilizotiwa magerezani, zinaishi maisha ya kifungwa. Magereza yameshikilia  watu, na kufanya watu wakae katika ukiwa.  Wapo waliotamani wazae lakini wamekwama. Leo tuwakamate mabwana jela wote na kuwafyeka kwa Jina la Yesu.

 

 

Katika 1PETRO 3:18-19 Imeandikwa...(Kwa maana Kristo naye aliteswa mara moja kwa ajili ya dhambi, mwenye haki kwa ajili yao wasio haki, ili atulete kwa Mungu; mwili wake akauawa, bali roho yake akahuishwa, 19 ambayo kwa hiyo aliwaendea roho waliokaa kifungoni, akawahubiri;). Wapo watu wanamdharau Yesu hata pale wanapoonywa ingawa bado wapo vifungoni magerezani. Wengine wakihubiriwa hukataa kusikia kama vile enzi za Sodoma na Gomora ilivyokuwa. Wengine husema haya ni maneno maneno tu ya wachungaji.

 

 

Imeandikwa katika UFUNUO 2:10....(Usiogope mambo yatakayokupata; tazama, huyo Ibilisi atawatupa baadhi yenu gerezani ili mjaribiwe, nanyi mtakuwa na dhiki siku kumi. Uwe mwaminifu hata kufa, nami nitakupa taji ya uzima.). Maandiko  yansema ibilisi atawatupa baadhi magerzani. Kwa kawaida, anayetupa haweki kwa utaratibu, na maana yake ni kile kisicho na thamani kwa atupaye. Ibilisi anatupa watu magerezani siyo kuwaweka.  Siri kubwa ya kutoka gerezani ni  kuwa mwaminifu.  Jitihada zako binafsi na wewe kuwa mwaminifu ndiko kutamfanya Mungu akutoe gerezani.

 

 

MIFANO YA WATU  WALIOWEKWA GEREZANI NA JINSI WALIVYOTOKA.

 

1.       YUSUFU:

 

Imeandikwa katika MWANZO 41:8-14....( 8 Hata asubuhi roho yake ikafadhaika; akapeleka watu kuwaita waganga wote wa Misri, na watu wote wenye hekima walioko. Farao akawahadithia ndoto yake, wala hakuna aliyeweza kumfasiria Farao mambo hayo.

9 Basi mkuu wa wanyweshaji akamwambia Farao akisema, Nayakumbuka makosa yangu leo. 10 Farao aliwakasirikia watumwa wake, akanitia nifungwe nyumbani mwa mkuu wa askari, mimi na mkuu wa waokaji. 11 Tukaota ndoto usiku mmoja, mimi na yeye; kila mtu kwa tafsiri ya ndoto yake tukaota. 12 Na huko pamoja nasi palikuwa na kijana; Mwebrania, mtumishi wa mkuu wa askari, tukamhadithia, naye akatufasiria ndoto zetu; akamfasiria kila mtu kama ilivyokuwa ndoto yake. 13 Ikawa, kama vile alivyotufasiria ndivyo ilivyotokea; mimi nalirudishwa katika kazi yangu, na yeye alitundikwa. 14 Ndipo Farao akapeleka watu, akamwita Yusufu, wakamleta upesi kutoka gerezani. Akanyoa, akabadili nguo zake, na kuingia kwa Farao.). Yusufu hata akiwa gerezani hakuacha kuombea watu. Hakuacha kuwatafasiria wengine ndoto zao. Wapo waliopo magerezani leo hii lakini hawaombei wengine, eti  kwa kisingizio cha kuumwa. Wapo wengine wamekwazwa na matukio fulani  na kuacha hata kuja kanisani kabisa.

 

 

UKIRI Gereza lolote lililoshikilia maisha yangu achia, Nakuomba Bwana Yesu leo unisikie tena na kunitoa niwe huru kwa Jina la Yesu. Amen

 

 

2.      DANIELI

Imeandikwa katika DANIELI 6:19-21...(Asubuhi mfalme akaondoka mapema, akaenda kwa haraka mpaka penye lile tundu la simba. 20 Naye alipolikaribia lile tundu, akamlilia Danieli kwa sauti ya huzuni; mfalme akanena; akamwambia Danieli, Ee Danieli, mtumishi wa Mungu aliye hai, je! Mungu wako, unayemtumikia daima, aweza kukuponya na simba hawa? 21 Ndipo Danieli akamwambia mfalme, Ee mfalme, uishi milele.). Kuna magereza ambayo ili utoke, unamhitaji Mungu peke yake. Umainifu wa Danieli ulimfanya atoke gerezani. Wapo wanaosema mimi namwangalia Mungu pekee simwangalii mwanadamu. Danieli alikuwa mwamnifu kwa Mungu na kwa Mfalme (mtu). Endapo wewe unashiriki ufisadi, maana yake siyo mwaminifu.  Na siyo rahisi kutoka gerezani.

 

 

NAMNA YA KUTOKA GERZANI

 

(a)    Njia ya Kuwa mwaminifu mbele za Mungu na watu. Hii ni njia aliyoitumia Danieli, na hata wewe na mimi yafaa tuitumia kila wakati.

 

(b)   Njia ya Kutoroka: Hii ni njia ya kuondoka bila kufuata utaratibu halali. Siyo kila siku yafaa kutoroka. Ile siku ambayo walinzi wamesinzia ndiyo yafaa kuwatoroka na kuachana nao kwa Jina la Yesu.

 

Kama ilivyoandikwa katika ISAYA 14:17...(Aliyeufanya ulimwengu ukiwa, akaipindua miji yake; Asiyewafungua wafungwa wake waende kwao?). Aliyetakiwa aolewe, leo hajaolewa. Aliyetakiwa azae leo hii ni  tasa. Je, unaweza kumuaga mtu wa aina hii? Hapana. Njia sahihi ni kumtoroka kwa Jina la Yesu.

 

 

Leo wewe ambaye hujaokoka ni sharti uokoke kwanza kabla ya kupokea na uwezo wa kutoroka kwenye magereza uliyowekwa kwa Jina la Yesu. Amen

 

 

©  MEDIA & INFORMATION MINISTRY, GLORY OF CHRIST (T) CHURCH ==GCTC== Tel: +255765979866 / or +255713459545 MOROGORO CHURCH