SALAMU ZA MWAKA MPYA 2017

GLORY OF CHRIST TANZANIA CHURCH,

KANISA LA UFUFUO NA UZIMA MOROGORO

JUMAMOSI -:- 31 DESEMBA 2016.

MHUBIRI:  HAPPINESS GODSON ISSA ZACHARIA 

                      (RP - MOROGORO)

Salamu za Mwaka Mpya zikitolewa na Mama (Happiness Godson Zacharia), RP - Morogoro usiku wa 31/12/2016.

Katika KUMBUKUMBU 11:10-12 imeandikwa …(Kwa kuwa nchi mwingiayo kuimiliki, si mfano wa nchi ya Misri mlikotoka, uliyokuwa ukipanda mbegu zako humo na kuinywesheleza kwa mguu wako, kama shamba la mboga; 11 lakini nchi mwivukiayo kuimiliki ni nchi ya vilima na mabonde, nayo hunyweshwa maji ya mvua ya mbinguni; 12 nayo ni nchi itunzwayo na Bwana, Mungu wako; macho ya Bwana Mungu wako, ya juu yake, tangu mwanzo wa mwaka hata mwisho wa mwaka.)

 

Mwaka wa 2017 ni mwaka tunaouanza huku tukiamini “MACHO YA MUNGU YAKO JUU YETU”. Imeandikwa katika ZABURI 1:1…(Heri mtu yule asiyekwenda Katika shauri la wasio haki;Wala hakusimama katika njia ya wakosaji;   Wala hakuketi barazani pa wenye mizaha. 2 Bali sheria ya Bwana ndiyo impendezayo,Na sheria yake huitafakari mchana na usiku. 3 Naye atakuwa kama mti uliopandwa Kandokando ya vijito vya maji,Uzaao matunda yake kwa majira yake, Wala jani lake halinyauki;Na kila alitendalo litafanikiwa.).  Na hizi ndizo salamu za mwaka mpya 2017, zilizogawanyika katika maakundi matatu:-

 

1.     SALAMU ZA KWANZA ZA MWAKA MPYA NI KWA KANISA LOTE

Kila mmoja  wetu atambue kuwa kama jicho la Mungu litakuwa juu yako, hakikisha kuwa kila siku unatembea katika Neno la Mungu,  na kwamba Neno la Mungu lisitoke moyoni mwako. Maana ya Kuokoka ni kutengwa na hivyo hakikisha kuwa kwa mwaka mzima wa 2017 unajiepusha na kwenda katika shauri la wasio haki, yaani wanapokuwepo watu waovu wewe huungani nao katika kuutenda uovu huo; Biblia inasema pia kuwa mtu huyo mwenye heri “Wala hakusimama katika njia ya wakosaji;  Wala hakuketi barazani pa wenye mizaha”.  Kama kanisa hatupaswi kushindana na shetani kwa njia za kimwili kwa sababu vita vyetu si juu ya damu na nyama. Wewe haupaswi kumjibu shetani kwa wigi ulizovaa, wala nguo uliyoivaa, wala chochote kile bali kitu utakachokifanya kwa mwaka 2017 ni kulitumia “Neno la Mungu”. Mwaka wa 2017 ni mwaka wa kumwambia shetani “Imeandikwa”.

 

2.     SALAMU ZA PILI ZA MWAKA MPYA NI KWA VIJANA WOTE

Tunaposoma katika 1TIMOTHEO 4:11-13, maneno ya Mungu  yanasema hivi:… (Mambo hayo uyaagize na kuyafundisha. 12 Mtu awaye yote asiudharau ujana wako, bali uwe kielelezo kwao waaminio, katika usemi na mwenendo, na katika upendo na imani na usafi. 13 Hata nitakapokuja, ufanye bidii katika kusoma na kuonya na kufundisha.). Mtume Paulo anakuasa wewe kama kijana kuwa mtu ye yote asiudharau ujana wako. Umri wa kijana ni hadi miaka 35. Wewe kama kijana ukitaka ujana wako usidharauliwe na mtu mwingine yeyote hakikisha kuwa unayasikiliza maneno haya kisha uyatende.

 

Kivipi? Kijana unatakiwa uwe na maisha ya kuwa kielelezo kwa watu wote watakaookoka leo, watakaookoka kesho na kwa wale watakaookoka mwaka mzima wa 2017. Uwe kikelezo katika  maneno yako: Yaani hata usemi wako usifanane na usemi wa watu wasiokoka. Kumbuka kuwa Usafi na Imani vinaendana pamoja. Je, upo na Bwana Yesu muda wote? Je, ukiwa shuleni wewe kama kijana unamdhihirisha Kristo kwa maneno na matendo yako? Ukiwa shuleni au mahali pengine popote, je watu wamekuwa wanakutumia kama mnyama wa majaribio (test animals) kwa mambo yasiyofaa? Kwani wewe umezaliwa ili utumike kama mnyama wa maabara ilihali wewe siyo kama panya? Watu wote wafanyao mambo ya aina hii ni mithili ya panya kwa sababu kila anayetaka kujifunza mambo machafu huwatumia vijana wa hii.  Kijana unapaswa kuwa kielelezo kwa wenzako katika kuvaa, unavyotembea, unavyosema n.k.

 

Tukisoma tena kwenye kitabu cha 1TIMOTHEO 4:14-16, maneno ya Mungu yanasema hivi: …(Usiache kuitumia karama ile iliyomo ndani yako, uliyopewa kwa unabii na kwa kuwekewa mikono ya wazee. 15 Uyatafakari hayo; ukae katika hayo; ili kuendelea kwako kuwe dhahiri kwa watu wote. 16 Jitunze nafsi yako, na mafundisho yako. Dumu katika mambo hayo; maana kwa kufanya hivyo utajiokoa nafsi yako na wale wakusikiao pia.). Wewe kama kijana usitoe nafasi kwa watu kutia mashaka juu ya wokovu wako kwa mwaka wote wa 2017.  Nyakati nyingine namna ya uvaaji wa nguo hutoa nafasi hizi kwa wasioamini kukejeli wokovu wako.  Kwa upande wa mabinti kuvaa vizuri ni jambo zuri, sawa ili kuitunza miili yenu kwa sababu ni  ya thamani  sana. Mtume Paulo anasema ujitunze nafsi yako na mafundisho yako. Uistumie kitu kingine bali tumia mafundisho haya ya Neno la Mungu uitunze nafsi yako.

 

Sherehe za Kuukaribisha Mwaka Mpya 2017 kwa Kuwasha Mishumaa,  Usiku wa 31/12/2016 (Ufufuo na Uzima Morogoro)

 

3.     SALAMU ZA TATU ZA MWAKA MPYA NI KWA WAMAMA WOTE

Imeandikwa katika LUKA 2:36-37 (Palikuwa na nabii mke, jina lake Ana, binti Fanueli, wa kabila ya Asheri, na umri wake ulikuwa miaka mingi,  alikuwa amekaa na mume miaka saba baada ya uanawali wake. 37 Naye ni mjane wa miaka themanini na minne; haondoki katika hekalu, ila huabudu usiku na mchana kwa kufunga na kuomba.). Biblia inamtaja huyu Nabii mke, Ana, binti Fanueli. Mama huyu aliishi na mume wake kwa miaka 7 tu, na alidumu hekaluni kwa miaka 84 akifunga na kuomba, hii ikimaanisha kuwa alikuwa mjane kwa miaka 77 mizima. Hata hivyo, baada ya miaka yote hii ya kuomba na kufunga, akampokea Yesu mikononi mwake siku ile ya Yesu ya kuwekwa wakfu.

 

Majeshi ya Bwana Yesu wakishangilia na kumshukuru Mungu baada ya Kuvuka salama kuingia Mwaka Mpya wa 2017.

Leo hii wapo watu ambao huyapangilia maisha yao kwenye mawazo yao, wakizijenga picha zote nzuri nzuri za maisha ya ndoa zao yatakavyokuwa pale watakapoolewa. Pengine wanapoangalia sinema za waigizaji wa maisha mazuri ya ndoa, watu hawa hutamani kuwa au kuishi kama wao. Bila shaka hii ni picha ambayo hata Ana binti Fanueli aliijenga mawazoni/akilini mwake: “Kwamba niolewapo, nitakuwa natembea na mume wangu barabarani tumeshikana mikono namna hii au ile, tutakuwa tunafanya hivi na vile, tukifurahia ndoa yetu hivi na hivi.” Hata hivyo mama huyu alidumu na mume wa ndoto yake kwa miaka 7 tu ya ndoa.  Hata baada ya hayo, Biblia inasema mama huyu hakutoka hekaluni kwa kipindi chote cha miaka 77, na hatimaye akampokea Yesu siku ile ya kuwekwa wakfu. Unaweza kujiuliza swali, hivi kwa miaka yote hii, je  huyu mama alikuwa akifunga na kuombea kitu gani? Wakati ukitafakari jibu la swali hilo, cha msingi tu kumbuka “Huyu ni mama aliyeishi Ng’ambo ya ndoto zake”!!!. Cha kukusihi hapa na kukutia moyo wewe mama ni kuwa usitoke hekaluni mwa Bwana, bali “ishi ng’ambo ya ndoto zako” (live beyond your dreams). Hata kama uliota ndoto na kwa sasa hiyo ndoto haielekei kutokea, bado endelea kuishi ng’ambo ya ndoto yako.

Mkesha wa Mwaka Mpya 
 

© Media and Information Ministry Glory of Christ Tanzania Church, (Kanisa la Ufufuo na Uzima) Mkundi - Morogoro Tel: +25571765979866 / +255713459545