SIKU YA 7 YA KUFUNGA NA KUOMBA ~ UFUFUO NA UZIMA

GLORY OF CHRIST TANZANIA CHURCH

[UFUFUO NA UZIMA MOROGORO]

JUMAPILI: 5 FEBRUARI 2017

MHUBIRI: Dr. GODSON ISSA ZACHARIA (SNP)

SOMO: KUOMBA KWA BIDII

Maana ya Kuomba ni kuongea na Mungu aliyetuumba. Maana nyingine ni namna ya kusemezana na Mungu aliyetuumba, na aliyeumba mbinngu na nchi. Ni namna ya kumsifu na kumshuukuru kwa mambo mbalimbali aliyokufanyia. Endpao Unamuomba Mungu kwa habari ya mahitaji yako tu siyo njia sahihi ya kuomba, bali anza kwanza na kumshukuru kwa mambo yote aliyokufanyia. Hata wanasiasa katika siasa zao majukwaani, huanza risala zao kwa kuwasifia viongozi wao wa kisiasa na baada ya hapo huchomekea mahitaji waliyo nayo katika eneo lao. Kama wanadamu wanaweza kufanya haya, je si zaidi kwa Mungu wetu aliyetuumba?

ZABURI 100:4….(Ingieni malangoni mwake kwa kushukuru; Nyuani mwake kwa kusifu; Mshukuruni, lihimidini jina lake;). Malangoni mwake Mungu ni Hekaluni, ni kuingia mahali hapo kwa shukrani. Hata jinsi Mungu alivyokuumba ni shukrani, kwa sababu pengine Mungu angekuumba kama nguruwe ungejisikia je?. Hata kwa kuwa na pua nzuri uliyo nayo, mshukuru Mungu kwa jinsi ulivyo. Usilalamike kwa kuwa na uso mpana, kuna watu wanaotamani kuwa na uso wa aina yako!

Kumuomba Mungu ni kubadilishana mawazo na Mungu wako. YOHANA 1:12…(Bali wote waliompokea aliwapa uwezo wa kufanyika watoto wa Mungu, ndio wale waliaminio jina lake;). Mungu kwetu ni Baba, na sisi ni watoto wake. Usimfanye Mungu kama jitu kubwa la kutisha sana kiasi kwamba kumwendea inakuwa ngumu. Kumuomba ni kusemezana naye na kubadilishana mawazo naye kwa habari ya ndoa yako, maisha yako, taifa lako, na kila kitu kinachokuhusu. Wengine huwaza kuwa kwa kuwa Mungu hatumuoni, basi kuomba kwao ni kama vile wanajisemesha wenyewe.

Imeandikwa katika ISAYA 1:18…(Haya, njoni, tusemezane, asema Bwana. Dhambi zenu zijapokuwa nyekundu sana, zitakuwa nyeupe kama theluji; zijapokuwa nyekundu kama bendera, zitakuwa kama sufu.). Kumbe Mungu mwenyewe anataka kuwapata watu wa kusemezana naye. Maana yake wewe ukimbilie nyumbani mwa Bwana au nyumbani kwako na kuanza kupeleka maombi yako kwake.

Kuomba ni kupeleka haja za moyo wako au mahitaji yako. WAFILIPI 4:6 imeandikwa hivi (Msijisumbue kwa neno lo lote; bali katika kila neno kwa kusali na kuomba, pamoja na kushukuru, haja zenu na zijulikane na Mungu.). Mungu anataka wewe umpelekee haja zako. Unahitaji nini katika maisha yako? Unahitaji kazi, unahitaji ndoa nzuri, n.k Omba kwa Bidii na vyote hhivi utavipata.

Katika MITHALI 8:17…imeandikwa hivi (Nawapenda wale wanipendao, Na wale wanitafutao kwa bidii wataniona.). Ingawa ni kweli unampenda Mungu, na amekuona kuwa unampenda, naye anakupenda, LAKINI ni kwa wale tu wanaomtafuta kwa BIDII ndiyo pekee watakaomuona. Mungu wetu siyo mdogo kama sindano, kiasi kwamba itakuiwia ngumu kumuona

NAMNA 2 ZA KUMTAFUTA MUNGU KWA BIDII:

1. Kufanya mambo / kazi za Mungu. kama ni kuombea mgonjwa hospitalini unakuwa upo hapo. Kama ni kuomba na kufunga na wewe hukosekani, n.k. Ni kama Yesu alivyotoa mfano akisema “Nilikuwa mgonjwa hammkja kuniona, nilikuwa uchi hamkunivisha nguo, nilikuwa na njaa hamkunilisha n.k.” Nao walishangaa ni lini Yesu alikuwa na maisha ya aina hiyo nao hawakumsaidia? Ndipo Yesu atawajibu kuwa kwa namna mlivyowatendea wadogo katika hawa ndivyo mlinitendea mimi. Yesu anaweza kuonekana katika maisha yako kwa kufanya kazi zake.

2. Kuomba. Hii ni silaha madhubuti ya kumshinda shetani, kwa kuwa kwa njia ya kuomba unakuwa unasemezana na Mungu na kubadilishana mawazo.

Namna zote mbili za kunmtafuta Mungu kwa Bidii hata kumuona zinaendana pamoja (yaani kuifanya kazi ya Mungu na Kuomba).

Katika YAKOBO 5:16 imeandikwa…(Ungameni dhambi zenu ninyi kwa ninyi, na kuombeana, mpate kuponywa. Kuomba kwake mwenye haki kwafaa sana, akiomba kwa bidii.). Tunaomba kwa bidii ili tumuone Yesu maishani mwetu. Utajuaje kuwa unavyoomba unaomba kwa Bidii? Tukisoma katika YOHANA 1:3 (Vyote vilifanyika kwa huyo; wala pasipo yeye hakikufanyika cho chote kilichofanyika.) na YOHANA 1:14…(Naye Neno alifanyika mwili, akakaa kwetu; nasi tukauona utukufu wake, utukufu kama wa Mwana pekee atokaye kwa Baba; amejaa neema na kweli.). Endapo utamtafuta Yesu unapata vyote. Siyo kupata viwili au vitatu au ishirini, ni vyote!! Kama unahitajji maji, Yesu anakuwa maji, kama unahitaji mshahara, Yesu anageuka na kuwa mshahara, kama unahitaji watoto, Yesu anageuka na kuwa watoto, n.k. Hi ni kwa sababu pale mlimani Musa alipotaka kujua Jina la Mungu ni lipi, Mungu alimjibu “MIMI NIPO AMBAYE NIPO”

Pia imeandikwa katika YAKOBO 5:17….(Eliya alikuwa mwanadamu mwenye tabia moja na sisi, akaomba kwa bidii mvua isinyeshe, na mvua haikunyesha juu ya nchi muda wa miaka mitatu na miezi sita.). Eliya alikuwa na tabia kama zako ulizo nazo wewe, lakini alipoamua kuomba kwa bidii alijibiwa.

HEZEKIA naye alifikia umri ambao Mungu alitaka kumtwaa. 2 WAFALME 20:1-6… (Siku hizo Hezekia akaugua, akawa katika hatari ya kufa. Isaya, nabii, mwana wa Amozi, akamjia akamwambia, Bwana asema hivi, Tengeza mambo ya nyumba yako; maana utakufa, wala hutapona. 2 Basi Hezekia akajigeuza, akaelekeza uso wake ukutani, akamwomba Bwana akasema, 3 Nakusihi, Bwana, ukumbuke sasa, jinsi nilivyokwenda mbele zako katika kweli na kwa moyo mkamilifu, na kutenda yaliyo mema machoni pako. Hezekia akalia sana sana. 4 Ikawa, kabla Isaya hajatoka katika mji wa kati, neno la Bwana likamjia, kusema, 5 Rudi, ukamwambie Hezekia, mkuu wa watu wangu, Bwana, Mungu wa Daudi baba yako asema hivi, Nimeyasikia maombi yako, na kuyaona machozi yako; tazama, nitakuponya; siku ya tatu utapanda nyumbani kwa Bwana. 6 Tena, nitazizidisha siku zako, kiasi cha miaka kumi na mitano, nami nitakuokoa wewe, na mji huu, na mkono wa mfalme wa Ashuru, nami nitaulinda mji huu kwa ajili yangu, na kwa ajili ya Daudi, mtumishi wangu.)

Kwa nini Hezekia aligeuzia kichwa chake ukutani na kuomba? Ni kwa sababu ni njia ya kujitenga na mambo mengine yote ya dunia hii, na ya nyumbani mwake. Faida mojawapo ya kuomba tena kwa machozi, ni kuwa maombi yako yanasikiwa. Endapo Hezekia asingeomba kwa bidii hakika angekufa kama alivyopewa taarifa hii na Nabii Isaya. Hiki kilikuwa kifo ambacho Mungu mwenyewe alishakiruhusu lakini kwa kuwa Hezekia aliomba kwa bidii, kifo hiki kilibatilishwa. Yamkini hata mashetani nao wamekupangia kifo katika ulimwengu wa roho. Ni juu yak oleo kung’ng’ana na kumsihi Mungu wetu uovu wa aina hiyo usitokee kwako kwa Jina la Yesu.

YESU mwenyewe aliomba, ingawa ni Mungu kwa 100%. WAEBRANIA 5:7 (Yeye, siku hizo za mwili wake, alimtolea yule, awezaye kumwokoa na kumtoa katika mauti, maombi na dua pamoja na kulia sana na machozi, akasikilizwa kwa jinsi alivyokuwa mcha Mungu;). Hebu waza, ingawa Yesu ni Mungu lakini aliomba. Kumbomoa shetani katika maombi ya kushindani ni njia tu ya kutumia silaha kumpiga shetani. Wewe u nani kama hauombi? Yesu pamoja na kuwa na mamlaka yote ya kimungu, lakini aliomba. LUKA 22:44…( Naye kwa vile alivyokuwa katika dhiki, akazidi sana kuomba; hari yake ikawa kama matone ya damu yakidondoka nchini.]).

Katika maombi ya wiki hii tokea Jumatatu hadi leo, tulikuwa tukijifunza staili mbalimbali za Kuomba kwa Bidii hadi majibu yapatikane. Kwa ufupi, tulijjifunza kuwa zipo staili tofauti tofauti za kuomba kwa bidii, na mojawapo ni:-

1. STAILI YA ELIYA. Utaona Eliya alipoomba kwa bidii ili mvua inyeshe, kuna mkao wake aliokuwa nao wakati huo. Maandiko yanasema "..........Naye Eliya akapanda juu mpaka kilele cha Karmeli; akasujudu kifudifudi, akainama uso mpaka magotini” (1 WAFALME 18:42). Akajitupa chini, akainama uso mpaka magotini, akaanza kuomba kwa bidii mpaka mvua ikanyesha. Aliendelea kuomba na akamwambia mtumishi wake nenda hata mara saba kuangalia dalili ya mvua.

2. STAILI YA YESU (Ni njia ya kulia na kutoa machozi). Kama ilivyoandikwa katika WAEBRANIA 5:7 (Yeye, siku hizo za mwili wake, alimtolea yule, awezaye kumwokoa na kumtoa katika mauti, maombi na dua pamoja na kulia sana na machozi, akasikilizwa kwa jinsi alivyokuwa mcha Mungu;), na pia imeandikwa katika LUKA 22:44…( Naye kwa vile alivyokuwa katika dhiki, akazidi sana kuomba; hari yake ikawa kama matone ya damu yakidondoka nchini.]). Ni maombi ya kuomba kwa bidii dhidi yay a dhiki yako hadi jibu litokee kwa Jina la Yesu.

3. MAOMBI YA STAILI YA HANA. Huu ni mfano dhahiri wa staili ya kuomba kwa bidii ya mtu aliyeomba kwa hisia na shauku kwa ajili ya kumpata mtoto Samweli. Hapa haikuwepo kuomboleza kwa kulia wala kupiga kelele Katika 1SAMWELI 1:10-13 ..(Naye huyo mwanamke alikuwa na uchungu rohoni mwake, akamwomba Bwana akalia sana. 11 Akaweka nadhiri, akasema, Ee Bwana wa majeshi, ikiwa wewe utaliangalia teso la mjakazi wako, na kunikumbuka, wala usinisahau mimi mjakazi wako, na kunipa mimi mjakazi wako mtoto mume, ndipo mimi nitakapompa Bwana huyo mtoto siku zote za maisha yake, wala wembe hautamfikilia kichwani kamwe. 12 Ikawa, hapo alipodumu kuomba mbele za Bwana, Eli akamwangalia kinywa chake.13 Basi Hana alikuwa akinena moyoni mwake; midomo yake tu ilionekana kama anena, sauti yake isisikiwe; kwa hiyo huyo Eli alimdhania kuwa amelewa.)

4. STAILI YA YAKOBO. Huyu aliomba usiku kucha na kukutana na malaika na kung’ang’ana ilia pate baraka zake. Imeandikwa katika MWANZO 32:24-26…. (Yakobo akakaa peke yake; na mtu mmoja akashindana naye mweleka hata alfajiri. 25 Naye alipoona ya kuwa hamshindi, alimgusa panapo uvungu wa paja lake; ukateguka uvungu wa paja la Yakobo alipokuwa akishindana naye. 26 Akasema, Niache, niende, maana kunapambazuka. Akasema, Sikuachi, usiponibariki.). Leo katika staili ya Yakobo tutadai haki zetu hadi tuzipate kwa Jina la Yesu.

5. MAOMBI YA STAILI YA DAUDI. Daudi na jeshi lake walipotoka vitani walikuta mji wao umechomwa na wake na watoto zao wametekwa na kuondoka na maadui zao. Jeshi lake lote lilitaka kumpiga Daudi mawe. Hata hivyo Daudi aliomba kuletewa NAIVERA, na kisha akamsihi Bwana akitaka jibu la ama alifuate jeshi la adui zake au la!! Ni aina ya maombi ya kumuuliza Mungu ukiwa na uchungu moyoni, kwa ajili ya kurudisha kile kilichoibiwa. Leo katika Staili yaMaombi ya Daudi tutaenda kuomba hadi kurudishiwa tena vile vyote vilivyoibiwa kwa Jina la Yesu.

6. MAOMBI YA KUMTEGEMEZA KUHANI. Kwamba Kuhani anapokuwa amechoka mnamtegemeza na hatimaye unawashinda maadui zote kwa Jina la Yesu. KUTOKA 17: 11-13.. (Ikawa, Musa alipouinua mkono wake, Israeli walishinda; na alipoushusha mkono wake, Amaleki walishinda. 12 Lakini mikono ya Musa ilikuwa mizito; basi wakatwaa jiwe, wakaliweka chini yake akalikalia. Haruni na Huri wakaitegemeza mikono yake, mmoja upande huu na mmoja upande huu; mikono yake ikathibitika hata jua lilipokuchwa. 13 Yoshua akawaangamiza Amaleki na watu wake kwa ukali wa upanga.)

=====================MWISHO===================

KWA MSAADA ZAIDI NA MAOMBEZI WASILIANA NA NASI KIPITIA:

FACEBOOK: Pastor Dr Godson Issa Zacharia

SIMU: 0719 798778 (Sms only)

BLOG: Ufufuo na Uzima Morogoro
http://ufufuonauzimamorogoro.blogspot.com/?m=0

GLORY OF CHRIST TANZANIA CHURCH,

(Kanisa la Ufufuo na Uzima)

Mkundi - Morogoro

Tel: +255719612874 / +255713459545

Tuesday, February 14, 2017

SIKU YA 7 YA KUFUNGA NA KUOMBA

Pages