SOMO: WALIO PAMOJA NASI

GLORY OF CHRIST TANZANIA CHURCH

[KANISA LA UFUFUO NA UZIMA]

GCTC → MOROGORO

JUMAPILI: 19 MARCH 2017

 

MHUBIRI:  PASTOR STEVEN NAMPUNJU (RP)

                    

Kuishi kwako hadi leo ni  kwa sababu lipo kusudi la Mungu la kukufanya uwe hai. Katika ISAYA 43:2 “Upitapo katika maji mengi nitakuwa pamoja nawe; na katika mito, haitakugharikisha; uendapo katika moto, hutateketea; wala mwali wa moto hautakuunguza.” Hivi ni kwa nini Mungu aahidi haya yote kwa ajili yako? Ni kwa sababu ipo sababu ya Kimungu ya kukuokoa na mabaya yote ili lile kusudi lake la  Kimungu la kukuumba liweze kutimia. Mfano  mwingine ni wakati ule Yesu akikamatwa  ili akahukumiwe, Petro aliutoa upanga wake na kumkata mmojawapo wa wale  maaskari na kumkata sikio.!!  Hata hivyo, Yesu alimwambia Petro aurudiishe ule upanga alani mwake kwa sababu kama ingekuwepo haja ya kufanya hivyo, Yesu angeamuru vikosi  vya jeshi la malaika toka mbinguni kuja na  kumlinda!! Ni udhihirisho kuwa, Mungu anao malaika walio upande wetu na ambao ni wengi kuliko majeshi ya wale walio upande wa adui zetu.

 

Pastor Steven Nampunju (RP) akihubiri Jumapili 19/3/2017 Ufufuo na Uzima Morogoro

 

Imeandikwa katika 2WAFALME 6:8-17 (Basi, mfalme wa Shamu alikuwa akifanya vita na Israeli. Akafanya mashauri na watumishi wake, akasema, Kituo changu kitakuwapo mahali fulani. 9 Yule mtu wa Mungu akapeleka habari kwa mfalme wa Israeli, kusema, Jihadhari, usipite mahali fulani; kwa sababu ndiko wanakoshukia Washami. 10 Mfalme wa Israeli akapeleka watu mpaka mahali pale alipoambiwa na yule mtu wa Mungu, na kuhadharishwa; akajiokoa nafsi yake, si mara moja, wala si mara mbili. 11 Basi mfalme wa Shamu moyo wake ukamfadhaika sana kwa ajili ya jambo hili; akawaita watumishi wake, akawaambia, Je! Hamtanionyesha, ni mtu yupi miongoni mwenu aliye upande wa mfalme wa Israeli? 12 Mmojawapo wa watumishi wake akasema, La, bwana wangu, mfalme; lakini Elisha, yule nabii aliye katika Israeli, humwambia mfalme wa Israeli maneno uyanenayo katika chumba chako cha kulala. 13 Akasema, Enendeni, mkamwangalie aliko, nipate kupeleka watu kwenda kumchukua. Akaambiwa ya kwamba, Tazama, yuko Dothani. 14 Kwa hiyo akapeleka huko farasi, na magari, na jeshi kubwa; wakafika usiku, wakauzingira mji ule pande zote. 15 Hata asubuhi na mapema mtumishi wake yule mtu wa Mungu alipoondoka, na kwenda nje, kumbe! Pana jeshi la watu, na farasi na magari, wameuzingira mji ule. Mtumishi wake akamwambia, Ole wetu! Bwana wangu, tufanyeje? 16 Akamjibu, Usiogope; maana walio pamoja nasi ni wengi kuliko wale walio pamoja nao. 17 Elisha akaomba, akasema, Ee Bwana, nakusihi, mfumbue macho yake, apate kuona. Bwana akamfumbua macho yule mtumishi; naye akaona; na tazama, kile kilima kilikuwa kimejaa farasi na magari ya moto yaliyomzunguka Elisha pande zote.). Mfalme wa Shamu alikuwa amepanga kuivamia Israeli, na kila mara siri ya uvamizi ule ile ikawa inavuja. Hiki ndicho kilichomfanya Mfalme wa Shamu kuhisi maofisa wake wa jeshi kuwa wanahusika. Hata hivyo, mipango yake hii ilikuwa wazi na dhahiri kwa Elisha, hata kama angeipanga mipango hii akiwa chumbani mwake.  Mfalme wa Shamu alipoambiwa ukweli huu, ilibidi apange jeshi lake kuizingira nyumba ya Elisha. Mtumishi wa Elisha alipoona jeshi limejaa nje ya nyumba yao, alimwambia Bwana wake “Ole wetu” akimaanisha kuwa ile vita ilikuwa siyo  tu ya Elisha peke yake bali ni ya wao wote.

 

Neno la Mungu linasema, “Jeshi lijapojipanga kupigana nami, sitaogopa”!!!. Mtumishi wa Elisha macho ya mwilini mwake yalikuwa yamefungwa asione, lakini pale Mungu alipoyafungua macho yake na kuona, ghafla alitiwa nguvu kwa sababu majeshi ya malaika waliowazunguka walikuwa wengi sana, na adui zao walikuwa pia wamezungukwa!! Ndiyo kusema, Mungu wetu huwatuma malaika zake ili kutulinda, na hivyo huna haja ya kuogopa. Na ndiyo maana pia imeandikwa katika WARUMI 8:31 “Basi, tuseme nini juu ya hayo? Mungu akiwapo upande wetu, ni nani aliye juu yetu?”. Ijapokuwa Israeli ilikuwa na jeshi lake, lakini Mungu alituma jeshi la malaika wa mbinguni kwa ajili ya kumzingira Elisha na Mtumishi wake tu.!! Kwa nini? Hii ni kwa sababu ndani ya Elisha lilikuwepo kusudi la kimungu la kuumbwa kwake.

 

Imeandikwa katika 2WAFALME 2:11-12..(Ikawa, walipokuwa wakiendelea mbele na kuongea, tazama! Kukatokea gari la moto, na farasi wa moto, likawatenga wale wawili; naye Eliya akapanda mbinguni kwa upepo wa kisulisuli. 12 Naye Elisha akaona, akalia, Baba yangu, baba yangu, gari la Israeli na wapanda farasi wake! Asimwone tena kabisa; akashika mavazi yake mwenyewe, akayararua vipande viwili.). Hapa tunaona tukio la gari la moto na farasi  wa moto kwa pamoja yakimtenga Eliya na Elisha. Ni maombi yangu kuwa, magari haya ya moto na farasi wa moto wa Mungu yakija yakutenge wewe na balaa zote, mikosi yote na dhiki zote zilizoelekezwa kwako na adui zako kwa Jina la Yesu.

 

Mamia ya Watenda kazi na Waumini wa Ufufuo na Uzima Morogoro wakifuatilia kwa makini Mahubiri 19/3/2017

 

Imeandikwa pia katika 2WAFALME 6:17-19 (Elisha akaomba, akasema, Ee Bwana, nakusihi, mfumbue macho yake, apate kuona. Bwana akamfumbua macho yule mtumishi; naye akaona; na tazama, kile kilima kilikuwa kimejaa farasi na magari ya moto yaliyomzunguka Elisha pande zote. 18 Na walipomtelemkia Elisha akamwomba Bwana, akasema, Uwapige, nakusihi, watu hawa kwa upofu. Akawapiga kwa upofu sawasawa na neno la Elisha. 19 Elisha akawaambia, Njia hii siyo, na mji huu sio, nifuateni mimi, nami nitawapeleka kwa mtu yule mnayemtafuta. Akawapeleka Samaria.). Maombi ya Elisha yalisababisha watu hawa kupigwa na Upofu. Hata hivyo, upofu uliopigwa kwa haya Majeshi ya Washami hapa siyo ule upofu wa kimwili. Ni akili zao zilipofushwa na kutoweza kujua kusudi lao. Roho ya upofu ikimwingia mtu, atashindwa kuona fursa zilizoko mbele yake. Ndiyo maana watu hawa walitoka sehemu sahihi aliyokuwepo Elisha waliyekuwa wanamtafuta, na kuelekezwa sehemu ingine isiyo sahihi. Hata Adamu na Eva kilichotokea kwao ni kupofushwa fikra zao baada ya kumsikiliza shetani na kula tunda lile walilokatazwa na Mungu wasile. Ndiyo kusema kwamba upofu wa fikra ndiyo mbaya kuliko upofu wa macho ya mwilini.

 

Imeandikwa katika 2WAFALME 7:3-11…(Basi walikuwapo watu wanne wenye ukoma, penye lango la mji; wakasemezana, Mbona tunakaa hapa hata tufe? 4 Tukisema, Tutaingia mjini, mjini mna njaa, nasi tutakufa humo; nasi tukikaa hapa, tutakufa vile vile. Haya! Twende tukaliendee jeshi la Washami; wakituhifadhi hai tutaishi; wakituua, tutakufa tu. 5 Basi wakaondoka kabla ya mapambazuko, ili waende mpaka kituo cha Washami; na walipofika mwanzo wa kimo cha Washami, kumbe! Hapana mtu. 6 Kwa maana Bwana alikuwa amewasikizisha Washami kishindo cha miendo ya magari, na kishindo cha farasi, kama kishindo cha jeshi kubwa; wakaambiana, Tazama, mfalme wa Israeli amewaajiri wafalme wa Wahiti, na wafalme wa Wamisri, waje wapigane nasi. 7 Kwa hiyo wakaondoka, wakakimbia kungali giza bado, wakaziacha hema zao, na farasi zao, na punda zao, na kimo chao vile vile kama kilivyokuwa, wakakimbia wapate kujiponya nafsi zao. 8 Basi wale wenye ukoma walipofika mwisho wa kituo, waliingia katika hema moja, wakala, na kunywa, wakachukua fedha, na dhahabu, na mavazi, wakaenda wakavificha; wakarudi, wakaingia katika hema ya pili, vile vile wakachukua vitu, wakaenda, wakavificha. 9 Ndipo wakaambiana, Mambo haya tufanyayo si mema; leo ni siku ya habari njema, na sisi tunanyamaza; mkingoja hata kutakapopambazuka, madhara yatatupata; basi twende tukawaambie watu wa nyumba ya mfalme. 10 Basi wakaenda, wakawaita mabawabu wa mji; wakawaambia, Tulifika kituo cha Washami, na tazama, hapana mtu ye yote huko, wala sauti ya mtu, ila farasi wamefungwa, na punda wamefungwa, na hema zao kama walivyoziacha. 11 Na mabawabu wakaita wakawaambia watu wa nyumba ya mfalme.). Wenye ukoma hawa walitengwa na jamii kwa kuwekwa nje ya mji wa Samaria. Siku ya habari njema hupaswi kunyamaza.  Maajabu ni watu leo hii, badala ya kuwaambia watu wengine kuwa wanelekea kanisani ili kuwavuta hao nao wapate ukombozi, watu hukaa kimya (hunyamaza) na kwenda kula vyakula vya rohoni peke yao kila wiki kanisani!

 

Unapoamua kujihatarisha kwa wakati mwingine ndiyo njia iliyo sahihi ya kuokoa maisha yako. Nje ya lango walikuwepo wakoma wengi sana, lakini ni wale wakoma wanne tu walioamua kujihatarisha, na kupitia ujasiri wao habari zao zimeandikwa hadi leo. Wakati mwingine shida huwa haiishi hadi pale utakapochukua hatua. Mungu huwa anamsaidia mtu aliyeamua kuchukua hatua. Meshaki, Shedraki na Abednego walipochukua hatua kwa kukataa kuiabudu miungu mingine ingawa walihatarisha uhai wao kwa imani waliyokuwa nayo kwa Mungu wao, lakini hata ndani ya tanuru la moto Mungu aliingia pamoja nao na kuwaepusha na madhara ya ule moto kwa Jina la Yesu.

 

Ndani ya Ngome za Jeshi la Washami zipo baraka na nyara zako. Kama huwezi kulivamia Jeshi la Washami hutaweza kujipatia chakula wala kuupata wokovu kwa Taifa lako. Ukichukua hatua, Mungu  huweka ulinzi kwako. Danieli naye alichukua hatua, na kwa kuwa alimjua Mungu anayemtumikia, hata mfalme alimtia moyo kwa kusema “Mungu wako unayemtumikia atakuepusha na simba hao wakali”, na ikawa hivyo.

 

UKIRI Kwa Jina la Yesu, kuanzia leo na kuanzia sasa, Nazilazimsha kazi zote za mashetani ziharibiwe zote leo kwa Damu ya Yesu. Naifungua nafsi na roho yangu kwa Jina la Yesu.

Mungu kwetu (Ufufuo na Uzima Morogoro) huabudiwa katika ROHO na KWELI, na ndivyo ilivyokuwa Jumapili 19/3/2017

 

Katika 1YOHANA 4:4 imeandikwa “Ninyi, watoto wadogo, mwatokana na Mungu nanyi mmewashinda, kwa sababu yeye aliye ndani yenu ni mkuu kuliko yeye aliye katika dunia”.  Tunajifunza kuwa, kumbe yapo makundi mawili yafanyayo kazi tofauti, kundi la aliye ndani yetu na linguine la aliye katika dunia hii. Kwa watoto wadogo wanaweza kushinda kwa sababu aliye ndani yao ni mkuu kuliko wa aliye katika ulimwengu huu.

 

Katika YOHANA 12:19 imeandikwa “Basi Mafarisayo wakasemezana wao kwa wao, Mwaona kwamba hamfai neno lo lote; tazameni, ulimwengu umekwenda nyuma yake”. Kwa upande wa Mafarisayo, hawakupenda kuona ulimwengu wote unamwendea Yesu Kristo. Ulimwengu wote ulikuwa upande wa Yesu. Kuna watu leo wanakuchukia wewe tu eti kwa sababu kiongozi wako kazini anakuwa upande wako.!! Na katika YOHANA 12:31 imeandikwa “Sasa hukumu ya ulimwengu huu ipo; sasa mkuu wa ulimwengu huu atatupwa nje.” Yesu  alijua kuwa mkuu wa ulimwengu  huu yupo, kwa sababu yeye Yesu alitokea mbinguni na duniani hapa siyo mahali pake. Tena imeandikwa pia katika YOHANA 14:30 (Mimi sitasema nanyi maneno mengi tena, kwa maana yuaja mkuu wa ulimwengu huu, wala hana kitu kwangu.). Hivi ni kwa nini Yesu aliyasema haya? Ni kwa sababu Yesu anajua kuwa mkuu wa ulimwengu huu hana kitu kwake na kwamba wapo malaika waliokuwa upande wake.

 

Imeandikwa katika 2NYAKATI 32:7-8 (Iweni hodari, na wa moyo mkuu, msiogope, wala msifadhaike kwa sababu ya mfalme wa Ashuru, wala kwa majeshi yote walio pamoja naye; kwa maana yupo mkuu pamoja nasi kuliko aliye pamoja naye; 8 kwake upo mkono wa mwili; ila kwetu yupo Bwana, Mungu wetu, kutusaidia, na kutupigania mapigano yetu. Na watu wakayategemea maneno ya Hezekia, mfalme wa Yuda.). Biblia inatuambia tusiogope, tuwe hodari na kuwa na moyo mkuu. Wako watu ambao ili waupate msaada, wanao mkono wa mwilini (pengine serikali yao, wachawi, mizimu n.k.).  Tukumbuke kuwa Bahari ya Shamu ilifanyika kikwazo kwa Musa na wana wa Israeli kutojua njia ya kuelekea nchi ya ahadi. Usipokuwa hodari na kuwa na moyo mkuu utajikuta unageuka na kutaka kurudi nyuma. Ipo nchi ya ahadi mbele zako, lakini shetani hataki uifikie hiyo nchi, na ndiyo maana anakuwekea Bahari ya Shamu kukuzuia. Mungu naye ameachilia watumishi wake ili kukusaidia tena kwa Jina la Yesu. Hata hivyo ili ufanikiwe, na  malaika hawa kukusaidia ni lazima uwe hodari na kuwa na moyo mkuu. Ni vizuri kusimama imara ili kuuona wokovu  wa Mungu wako kwa Jina la Yesu. Ukiwa na shida suluhisho siyo kurudi  nyuma. Ukiwa na moyo mkuu, hutaogopa matukio makubwa yatakayotokea maishani mwako.  Mungu anayo miujiza yake kwako, lakini na kwa wale wenye moyo mkuu hawajiulizi maswali kwa sababu wanamwamini  Mungu.

 

Platform wa Ufufuo na Uzima Morogoro wakimwimbia Bwana wanaimba kwelikweli, na wakiwa katika Kuabudu, vivyo hivyo!

 

Chanzo cha taabu au dhiki uliyo nayo inatokana na mashetani kukiwinda kile kitu alichokiweka Mungu rohoni mwako. Mungu kwa wakati mwingine anaruhusu matatizo yakupate ili kuwafanya wengine waokoke. Usiogope! Uwe na Moyo Mkuu!! Daudi alipoona Goliathi anatukana majeshi ya Bwana, aliuliza “Ni kitu gani ambacho atakayemuua huyu mfilisti atapatiwa?” Ni kwa sababu Daudi alijua kuwa baada ya kumuua Goliathi Mtukanaji (adui zako, mashetani, wachawi, majini n.k) kutakuwepo na malipo ambayo wewe uliyemuua utapatiwa katika Jina la Yesu.

 

Jeshi la Washami waliizingira nyumba ya Elisha katika ulimwengu wa mwili. Leo hii katika ulimwengu wa roho, yapo majeshi ya rohoni yanayoweza kukuzingira, lakini kama ilivyotokea kwa mtumishi wa Elisha, siyo rahisi kuyaona majeshi ya rohoni. Ndiyo maana wapo watu husema, ilikuwa je nimekaa na shida zangu hizi miaka yote hii na sikuweza kuja hapa Kanisani Ufufuo na Uzima? Ni kwa sababu shetani anakuwa amepofusha macho yako ya rohoni. Hawa ndiyo watu ukiwashuhudia waje kanisani kuombewa husema wanazo dini zao!!. Watu hawa wa dini wanakuwa tayari kwenda kwa  waganga wa kienyeji ingawa kimsingi hiyo nayo siyo dini yao.

 

UKIRI Kwa Jina la Yesu, mimi ninazingirwa na moto wa Bwana. Walioniteka watekwe wao.  Walionizingira wazingirwe wao. Kuanzia leo nageuka kuwa mwali wa moto. Kuanzia sasa ninakataa kudhulumiwa haki zangu, kwa kuwa imeandikwa nitakuwa kichwa wala siyo mkia, katika Jina la Yesu.

Umati wa Watendakazi na Waumini wa Ufufuo na Uzima Morogoro wakisikiliza maelekezo ya Maombi ya Jumapili 19/3/2017  

 
 

Ili ufanikiwe itategemea sana ni nani aliye upande wako. Katika 1YOHANA 4:4 “Ninyi, watoto wadogo, mwatokana na Mungu nanyi mmewashinda, kwa sababu yeye aliye ndani yenu ni mkuu kuliko yeye aliye katika dunia”. Kumbe ushindi  wa mtu hutokana na yule aliyeko ndani yake. Shida ulizo nazo zinatokana na wewe kutokuwa na mwenye nguvu yaani Yesu Kristo maishani mwako. Ukimpokea Yesu ndani mwako, atakuponya na kukufungua kutoka kwenye shida uliyo nayo, kwa sababu Yesu atakuwa ndani yako. Hata kama uliwahi kuombewa na mamia ya wachungaji na shida yako ikabaki pale pale, suluhisho lako siyo maombi ya wachungaji kwa sababu wachungaji hawa hurudi majumbani mwao, ila ukimfanya  Yesu awe rafiki yako na kuingia ndani mwako, siku zote YESU atakuwa pamoja nawe.  Cha kufanya leo kwa wewe ambaye hujaokoka, ni kumkubali Yesu maishani mwako kwa maana ya kuokoka ili ukiwa upande wa Yesu ufanyike kiumbe kipya.

 

========== AMEN ========

 

KWA MSAADA ZAIDI NA MAOMBEZI WASILIANA NASI KIPITIA:

FACEBOOK: Pastor Dr Godson Issa Zacharia

SOMO: WALIO PAMOJA NASI

Follow us on INSTAGRAM: pastordrgodson

Follow us on YOUTUBE: pastor:dr.godson

TEL: 0719 798778 (Sms only)

BLOG: Ufufuo na Uzima Morogoro http://ufufuonauzimamorogoro.blogspot.com/

 

© Media and Information Ministry GLORY OF CHRIST TANZANIA CHURCH, (Kanisa la Ufufuo na Uzima) Mkundi - Morogoro Tel: +255719612874 / +255713459545