VITA YA MUOTA NDOTO

GLORY OF CHRIST TANZANIA CHURCH

UFUFUO NA UZIMA - MOROGORO

JUMAPILI:  21 AUGUST 2016

 

Na: STEVEN NAMPUNJU – (RP MOROGORO)

 

RP Steven Nampunju akifundisha somo "Vita ya Muota Ndoto" Jumapili 21/8/2016 katika
Bonde la Maono - Ufufuo na Uzima Mkundi - Morogoro

 

 

Katika maisha ya kawaida, watu  huota Ndoto. Wengine kwa sasa utawakuta ni watu wazima lakini bado wanaota ndoto eti wanajiona wapo darasani hadi sasa hivi‼‼!. Wengine wapo mijini lakini ndoto zao huota wakiwa viijini mwao wanatembea na miguu bila viatu na vitu kama hivyo.

 

Swali la kujiuliza ni Je, Ndoto ni nini? "Ndoto ni dirisha la muonekano wa vitu vinavyoendelea katika ulimwengu wa roho". Kweye ulimwengu wa mwili wanadamu pia hupenda kuangalia taarifa ya habari katika TV ili kujua yale yanayoendelea katika ulimwengu huu wa mwili. Kwa hiyo Mungu hupenda kumfunulia mwanadamu yale ya ulimwengu wa roho kupitia ndoto, kama ambavyo redio na TV humuonesha mtu yanayoendelea katika ulimwengu wa  mwili.

 

 

Mungu anazijua hatima za kila mtu,na kwamba alikuumba kwa makusudi gani, na yapin yatakuwa matukio yako hapa duniani. AYUBU 33:14-17 ...(Kwa kuwa Mungu hunena mara moja, Naam, hata mara ya pili, ajapokuwa mtu hajali. 15 Katika ndoto, katika maono ya usiku, Usingizi mzito uwajiliapo watu, Katika usingizi kitandani; 16 Ndipo huyafunua masikio ya watu, Na kuyatia muhuri mafundisho yao, 17 Ili amwondoe mtu katika makusudio yake, Na kumfichia mtu kiburi; )... Kumbe ukiona unaiota ndoto mara nyingi ngyini ikijirudia maana yake wewe haujali.)

 

MWANZO 41:32 (Na ndoto ya Farao kwa vile ilivyokuja mara mbili, ni kwa sababu neno hilo Mungu amelithibitisha, na Mungu atalitimiza upesi.)....Ukiona unaota ndoto na inayojirudia rudia zaidi ya mara moja ujue

•      Hakika ndoto hiyo ni  halisi na itakuja upesi

•       Uliidharau ndoto ile ulipoiota mara ya kwanza, na sasa unakumbushwa.

 

 

KWA NINI WATU TUOTE NDOTO?

 

Mtu akiwa katika ulimwengu wa mwili, na akayatazama mambo katika ulimwengu wa mwili  hawezi kamwe kufanikiwa. Ili mtu  afanikiwe, lazima autumie ulimwengu wa roho kikamilifu. Ndoto ni kama bahasha tu ambayo ndani yake imebeba barua halisi yenye ujumbe kamili. Kama unayo changamoto yoyote katika maisha yako, ujue majibu yake yapo katika ndoto unazoziota.

 

Sehemu tu ya Umati wa watu waliohudhuria ibada Jumapili 21/8/2016 katika Bonde la Maono
Ufufuo na Uzima Mkundi -Morogoro wakimshangilia Bwana Yesu.

 

 

AINA 3 ZA NDOTO:

Zipo aina nyingi za ndoto, lakini leo tutazungumzia

 

1.       NDOTO ZA KIPEPO

Hizi zina lengo la kumtia hofu mtu, au  kuharibu maisha ya mtu. Mashetani yanao uwezo wa kumtoa mtu katika makusudio yake.

YUDA 1:8....(Kadhalika na hawa, katika kuota kwao, huutia mwili uchafu, hukataa kutawaliwa, na kuyatukana matukufu.).... Mtu anaweza kuota ndoto na kuanza kuyatukana matukufu. Na njia hii ya uotaji huutia mwili uchafu, maana yake ni maisha yake kugeuka na kuwa machafu kutokana na ndoto aliyoiota mtu mhusika.

 

2.      NDOTO ZA KIBINADAMU

 

MHUBIRI 5:3....(Kwa maana ndoto huja kwa sababu ya shughuli nyingi; na sauti ya mpumbavu kwa njia ya wingi wa maneno.)..... Hizi ni ndoto anazoota mtu kutokana na shughuli zake za kazi zake za kawaida. Hapa  utawakuta watu kama vile makondakta wa daladala wakiota ndoto usiku wakipiga debe, kuita abiria n.k. Wengine kama ni wauza mitumba wataota ndoto wakipigia debe mitumba. Ukiwashtua usiku huo huo watu hawa watakwambia walikuwa wanaota wakiwa katika shughuli zao za maisha.

 

 

3.      NDOTO ZA KIMUNGU

 

Hizi ni ndoto zenye malengo ya kumuonya mtu, kumpa mtu maarifa, kumwelekeza mtu n.k.

HESABU 12:6...(Kisha akawaambia, Sikizeni basi maneno yangu; Akiwapo nabii kati yenu, Mimi, Bwana, nitajifunua kwake katika maono, Nitasema naye katika ndoto.)....

 

 

Imeandikwa pia katika YEREMIA 23:28....(Nabii aliye na ndoto, na aseme ndoto yake; na yeye aliye na neno langu, na aseme neno langu kwa uaminifu. Makapi ni kitu gani kuliko ngano? Asema Bwana.)....Kumbe kuna uwezekano wa Mungu  kuwatumia manabii wake ukuufikisha ujumbne kupitia ndoto zao.

 

 

AYUBU 33:17....(Ili amwondoe mtu katika makusudio yake, Na kumfichia mtu kiburi;).... Mungu anasema na mtu kwa lengo la kumuondoa mtu katika makusudio yake. Mfano mzuri ni wa Yusufu aliyemposa Mariamu mamaye Yesu. Katika Kitabu  cha Mathayo, Biblia inasema Yusufu alikusudia kumuacha Mariamu kwa siri baada ya kuona kuwa yu mjamzito na hakutaka kumuaibisha mchumba wake. Kwa kuwa ni  ngumu kujua siri za mtu na amekusudia kufanya nini kwa siri, basi njia pekee ni ya Mungu kusema na mtu wa aina hii ni  kwa njia ya ndoto.

 

 

KWA NINI WATU WANAOTA NDOTO?

 

Imeandikwa katika AMOSI  3:7...(Hakika Bwana MUNGU hatafanya neno lo lote, bila kuwafunulia watumishi wake manabii siri yake.). Tunajifunza kuwa kumbe Mungu hafanyi jambo bila kuwafunulia watumishi wake.  Je, shida uliyo nayo uliwahi kufunuliwa na Mungu? Jibu ni Ndiyo. Leo ni siku ya kuanza upya kwa kuwa ndoto zako lazima zitimie katika Jina la Yesu. Watu wengine ni wazuri kuwasifia watoto wao kuwa watakuja kuwa watumishi wakubwa wa Mungu lakini wanasahau kuanza maandalizi ya kuwafanya hao watoto waingie katika huo mfumo kwa kuwaombea. Wapo wengine walikuwa wakiota ndoto kipindi cha nyuma lakini kwa sasa hawaoti ndoto tena na pengine hata wakiota wanasahau walichoota ni nini‼ Hii inamaanisha kuwa, Mungu aliyekuwa akikuotesha ndoto ameona hakuna umuhimu tena wa kukupa taarifa hizi kwa njia ya ndoto kila mara kwa kuwa wewe ukipewa  hufanyii kazi.

 

MAMBO MUHIMU YA KUFAHAMU NDANI YA NDOTO

Yapo mambo  mengi sana katika ndoto. Zipo siri kadhaa wa kadhaa ndani ya ndoto. Hata hivyo leo tuangalie mambo machache:

 

1.       Ndoto yaweza kumtisha mtu

 

AYUBU 7:14....(Ndipo unitishapo kwa ndoto, Na kunitia hofu kwa maono;). Ndani ya ndoto vyaweza kuwepo  vitisho. Mungu anaweza kumtisha mtu katika ndoto na shetani vile vile.

 

2.      Ndoto yaweza kumfadhaisha mtu

Ndani ya ndoto inaweza kuwepo siri, ili mtu anapoiota hiyo  ndoto, mtu huyo afedheheke na asiendelee tena na mpango aliokuwa nao.  Mathalani, endapo ulikuwa unaota ndoto fulani juu ya kazi uliyokuwa unaifuatilia,  unapojikuta unafadhaishwa, uujue hapo shetani ameingilia kati ili kuacha huo mpango wa mafanikio yako.

 

3.      Ndani ya ndoto kuna kipimo halisi cha rohoni cha jinsi  mtu alivyo rohoni

 

Siri kubwa ipo ndani ya ndoto unapoota, na ndiyo njia ya kumfanya mtu ajijue yupo je rohoni mwake.

Imeandikwa katika MWANZO 20:2-6....(Ibrahimu akamnena Sara mkewe, Huyu ni ndugu yangu. Basi Abimeleki mfalme wa Gerari akapeleka watu akamtwaa Sara. 3 Lakini Mungu akamjia Abimeleki katika ndoto ya usiku, akamwambia, Umekuwa mfu wewe kwa sababu ya mwanamke huyu uliyemtwaa, maana ni mkewe mtu. 4 Basi Abimeleki alikuwa hakumkaribia, akasema, Ee Bwana, Je! Utaua hata taifa lenye haki? 5 Je! Hakuniambia mwenyewe, Huyu ni ndugu yangu? Na mwanamke mwenyewe naye alisema, Huyu ni ndugu yangu. Kwa ukamilifu wa moyo wangu, na kwa kuwa safi mikono yangu, nimefanya hivi. 6 Mungu akamwambia katika ndoto, Nami nimejua ya kwamba kwa ukamilifu wa moyo wako umefanya hivi, ndipo nami nikakuzuia usinitendee dhambi, kwa hiyo sikukuacha umguse.)... Tunamuona Abimeleki kuwa ni mkamilifu rohoni, na kipimo hiki amekipata kupitia ndotoni. Ni maombi yetu kuwa Mungu akupe uwezo  wa kuwashinda maadui zako rohoni na mwilini katika Jina la Yesu. Mathalani endapo unaota ndoto ukiwa unakabwa usiku, ujue hicho ni kipimo tosha kuwa haupo vizuri kiroho.

 

4.      Ndani ya ndoto kuna maelekezo ya usiyoyajua

 

Ndani ya ndoto ipo siri usiyoijua. Imeandikwa katika MWANZO 28:12-16...(Akaota ndoto; na tazama, ngazi imesimamishwa juu ya nchi, na ncha yake yafika mbinguni. Tena, tazama, malaika wa Mungu wanapanda, na kushuka juu yake. 13 Na tazama, Bwana amesimama juu yake, akasema, Mimi ni Bwana, Mungu wa Ibrahimu baba yako, na Mungu wa Isaka; nchi hii uilalayo nitakupa wewe na uzao wako. 14 Na uzao wako utakuwa kama mavumbi ya nchi, nawe utaenea upande wa magharibi, na mashariki, na kaskazini, na kusini; na katika wewe, na katika uzao wako, jamaa zote za dunia watabarikiwa. 15 Na tazama, mimi nipo pamoja nawe, nitakulinda kila uendako, nami nitakuleta tena mpaka nchi hii, kwa maana sitakuacha, hata nitakapokufanyia hayo niliyokuambia. 16 Yakobo akaamka katika usingizi wake, akasema, Kweli Bwana yupo mahali hapa, wala mimi sikujua). Yakobo alikuwa anakimbia kuiponya roho yake. Kwa kuwa alikuwa anakimbia,  maana yake hakuwa na maandalizi yoyote. Na kile asichokijua ni kuwa Mungu alikuwepo mahali  pale.

 

5.      Ndani ya ndoto zako ipo siri ya hatima yako

 

Katika ndoto anazoota mtu, ipo ndoto moja iliyobeba siri ya hatima  yake. Ukiwaona wahubiri, waimbaji wa Injili na wengineo,  ukiwauliza swali juu yao watakuambia zipo ndoto walizokuwa wakiota nyakati fulani maishani mwao kabla ya kuwa vile walivyo.

Imeandikwa katika MWANZO 37:1-4...( Yakobo akakaa katika nchi aliyosafiri baba yake, katika nchi ya Kanaani. 2 Hivi ndivyo vizazi vya Yakobo. Yusufu, aliyekuwa mwenye miaka kumi na saba, alikuwa akichunga kondoo pamoja na ndugu zake; naye alikuwa kijana pamoja na wana wa Bilha, na wana wa Zilpa, wake wa baba yake. Yusufu akamletea baba yao habari zao mbaya. 3 Basi Israeli akampenda Yusufu kuliko wanawe wote, maana ni mwana wa uzee wake, akamfanyia kanzu ndefu. 4 Ndugu zake wakaona ya kuwa baba yao anampenda kuliko ndugu zake wote, wakamchukia, wala hawakuweza kusema naye kwa amani.)... Unaweza kuiona familia ambayo mmezaliwa watu 6 au zaidi, na wenzako wote wameungana ila wewe pekee wanakuchukia. Hiyo siyo shida, kwa sababu Mungu anakuwa ameweka makusudi mazuri maishani mwako. Yusufu alipendwa na baba yake kuliko wengine, na huu ukawa mwanzo wa wenzake kumchukia.

 

MWANZO 37:5....(Yusufu akaota ndoto, akawapa ndugu zake habari, nao wakazidi kumchukia;).

Chuki zingine hutokea kwa sababu ya ndoto  zako. Maadui zako hutiwa hofu na aina ya ndoto unayoiota. Ni maombi yetu kwa Mungu kuwa maadui zako  watiwe hofu kupitia ndoto zako kwa Jina la Yesu. Kipindi kile cha Gideoni, katika Kitabu cha Waamuzi, adui zake waliota ndoto wenyewe na kuitafsiri wenyewe na baada ya hiyo wakawa na hofu na kukimbia hovyo. Ni maombi yetu kwa Mungu kuwa adui zako waote ndoto ziwatie hofu na kukukimbia wakuonapo kwa Jina la Yesu.

  

Imeandikwa katika MWANZO 37:6-8 .... (akawaambia, Tafadhalini, sikieni ndoto hii niliyoiota. 7 Tazama, sisi tulikuwa tukifunga miganda shambani, kumbe! Mganda wangu ukaondoka ukasimama, na tazama, miganda yenu ikazunguka ikainama mbele ya mganda wangu. 8 Ndugu zake wakamwambia, Je! Kweli wewe utatumiliki sisi? Nawe utatutawala sisi? Wakazidi kumchukia kwa ajili ya ndoto yake, na kwa maneno yake). Ndugu za Yusufu waligundua kuwa ile miganda ni wao wenyewe,  na kwa tafasiri hii waliongeza chuki zaidi.

 

 

Imeandikwa katika MWANZO 37:9-11.... (Akaota tena ndoto nyingine, akawaambia ndugu zake, akasema, Angalieni, nimeota ndoto nyingine; na tazama, jua na mwezi na nyota kumi na moja zikaniinamia. 10 Akawaambia baba yake na ndugu zake; baba yake akamkemea akamwambia, Ni ndoto gani hii uliyoiota? Je! Mimi na mama yako na ndugu zako tutakuja tukusujudie hata nchi? 11 Ndugu zake wakamhusudu; bali baba yake akalihifadhi neno hili.). Ndani ya ndoto za Yusufu ilikuwepo picha ya hatima yake.  Waliokuwa wakisimuliwa waliweza haraka kujua siri za zile ndoto, ingawa kwa Yusufu kutafasiri ndoto alikuwa bado hajaanza rasmi.

 

Maombezi yakiendelea kufanywa kwa watu wenye vita ya muota ndoto

 

Imeandikwa katika MWANZO 40:5-22....( 5 Wakaota ndoto wote wawili, kila mtu ndoto yake usiku mmoja, kila mtu kwa tafsiri ya ndoto yake, mnyweshaji   na mwokaji wa mfalme wa Misri waliofungwa gerezani. 6 Yusufu akawajia asubuhi, akawaona wamefadhaika.).  Hawa ni wafungwa wamefungwa gereza moja lakini  wakaota ndoto tofauti tofauti. Ukiona mtu amefadhaika,  ujue ipo ndoto aliyoiota na ambayo hajui tafasiri yake.

 

 

Katika MWANZO 40:7-23 Imeandikwa hivi ... (Akawauliza hao maakida wa Farao, waliokuwa pamoja naye katika kifungo, nyumbani mwa bwana wake, akisema, Mbona nyuso zenu zimekunjamana leo? 8 Wakamwambia, Tumeota ndoto wala hapana awezaye kuifasiri. Yusufu akawaambia, Kufasiri si kazi ya Mungu? Tafadhalini mniambie. 9 Mnyweshaji mkuu akamhadithia Yusufu ndoto yake; akamwambia, Katika ndoto yangu nimeota, uko mzabibu mbele yangu. 10 Na katika mzabibu mlikuwa na matawi matatu, nao ulikuwa kana unamea, unachanua maua, vishada vyake vikatoa zabibu zilizoiva. 11 Na kikombe cha Farao kilikuwa mkononi mwangu, nikazitwaa zabibu, nikazikamua katika kikombe cha Farao, nikampa Farao kikombe mkononi mwake. 12 Yusufu akamwambia, Tafsiri yake ndiyo hii. Matawi matatu ni siku tatu. 13 Baada ya siku tatu Farao atakiinua kichwa chako, atakurudisha katika kazi yako; nawe utampa Farao kikombe mkononi mwake, kama desturi ya kwanza, ulipokuwa mnyweshaji wake. 14 Ila unikumbuke mimi, utakapopata mema, ukanifanyie fadhili, nakuomba, ukanitaje kwa Farao, na kunitoa katika nyumba hii. 15 Kwa sababu hakika naliibiwa kutoka nchi ya Waebrania, wala hapa sikutenda neno lo lote hata wanitie gerezani. 16 Mkuu wa waokaji alipoona ya kwamba hiyo tafsiri ni ya mema, akamwambia Yusufu, Mimi kadhalika nilikuwa katika ndoto yangu, na tazama, ziko nyungo tatu za mikate myeupe juu ya kichwa changu. 17 Na katika ungo wa juu, mlikuwa na kila namna ya chakula kwa Farao, kazi za mwokaji; ndege wakavila katika ungo juu ya kichwa changu. 18 Yusufu akajibu, akasema, Tafsiri yake ndiyo hii Nyungo tatu ni siku tatu. 19 Baada ya siku tatu Farao atakiinua na kukuondolea kichwa chako, na kukutundika juu ya mti, na ndege watakula nyama yako. 20 Ikawa siku ya tatu, siku ya kuzaliwa kwake Farao, akawafanyia karamu watumwa wake wote;    akakiinua kichwa cha mkuu wa wanyweshaji, na cha mkuu wa waokaji, miongoni mwa watumwa wake. 21 Akamrudisha mkuu wa wanyweshaji katika kazi yake ya kunywesha, naye akampa Farao kikombe mkononi mwake. 22 Bali akamtundika mkuu wa waokaji, kama Yusufu alivyowafasiria.). Kuna shida uliyo  nayo leo  lakini kumbe ni moja ya ndoto ulizoota miaka mingi iliyopita. Usipende kufanana na mtu fulani  kwa sababu kila mtu huoteshwa ndoto yake kivyake. Usifanye kama lile jeshi la Farao ambalo waliona Israeli wakipita pakavu nao wakaingia pale pale na mwishowe mafuriko ya maji  yakawauwa wote.

 

 

 

6.      Unaweza kuuawa kwa sababu ya ndoto zako

 

MWANZO 37:18-20....(Wakamwona toka mbali, na kabla hajawakaribia, wakafanya shauri juu yake ili wamwue. 19 Wakasemezana wao kwa wao, Tazama, yule bwana wa ndoto anakuja. 20 Haya, twende, tukamwue na kumtupa katika birika mojawapo, nasi tutasema, Mnyama mkali amemla; kisha tutaona zitakuwaje ndoto zake.). Mipango miovu inapangwa juu ya mauti ya mtu lakini chanzo cha yote haya ni zile ndoto anazoziota mtu huyu. Usidhani ni kila mtu anafurahia ndoto zako. Wanadamu wanaweza kufanya mipango ya kuzuia mafanikio yako, au kushindana na ndoto zako.

 

 

7.      Ndani ya ndoto zipo mbinu na namna ya  kukabilana na chagnamoto zilizo  mbele yako

 

Unaweza kujiona kuwa una amani, na unakaa vizuri na familia yako. Hata hivyo Mungu aweza kukuotesha ndoto na namna ya kukabiliana na yale maovu yaliyopangwa juu yako au ndoa yako.

 

Ukisoma Kitabu cha MWANZO 41:1-36 utagundua kuwa, wapo  watu waliomsahau Yusufu baada ya kutolewa gerezani. Zipo hali unazoishi leo kwa sababu ulimsahau Yusufu uliyekuwa naye gerezani. Wazazi wako wapo vijijini na wanapata shida, lakini wewe leo hii unaendelea na maisha mazuri mjini  na huku umewasahu wazazi wako. Umeokoka, na ndugu zako hata hujawahubiria‼!. Yusufu hakupoteza muda wake kumpa maagizo yoyote yule mfungwa ambaye baada ya siku 3 atanyongwa, bali alimpa maagizo yule ambaye atakuja  kuwa mbele ya Mfalme siku zote kwamba asimsahau!!!!.

 

Yusufu alikumbukwa tena pale mfalme alipoota ndoto. Hata hivyo alipotolewa gerezani ilibidi abadilishiwe mavazi yake ya ufungwa. Wengi wetu leo hii tunataka kumwendea Mfalme Yesu tukiwa bado na mavazi ya ufungwa. Hii si vyema. Badilisha mavazi uliyotoka nayo gerezani kwanza, ili uweze kukaa na Mfalme Yesu maishani  mwako.

 

 

Imeandikwa katika MWANZO 41:30-36....(Kisha kutakuja miaka saba ya njaa baada yake; na shibe ile yote itasahauliwa katika nchi ya Misri, na njaa itaiharibu nchi. 31 Wala shibe ile haitajulikana katika nchi kwa sababu ya njaa inayokuja baadaye, maana itakuwa nzito sana. 32 Na ndoto ya Farao kwa vile ilivyokuja mara mbili, ni kwa sababu neno hilo Mungu amelithibitisha, na Mungu atalitimiza upesi. 33 Basi, Farao na ajitafutie mtu wa akili na hekima amweke juu ya nchi ya Misri. 34 Farao na afanye hivi, tena akaweke wasimamizi juu ya nchi, na kutwaa sehemu ya tano katika nchi ya Misri, katika miaka hii saba ya kushiba. 35 Na wakusanye chakula chote cha miaka hii myema ijayo, wakaweke akiba ya nafaka mkononi mwa Farao wakakilinde kuwa chakula katika miji. 36 Na hicho chakula kitakuwa akiba ya nchi kwa ajili ya miaka hiyo saba ya njaa, itakayokuwa katika nchi ya Misri, nchi isiharibike kwa njaa.). Zipo njaa zenye kuharibu nchi, njaa zenye kuharibu vipawa vya watu. Watu wengi hawajifunzi kuweka akiba.

 

 

UKIRI Kuanzia leo,  na kuanzia sasa, Ninawakabili mashetani na majini,  yaniache kwa Jina la Yesu. Amen

 

 

NIFANYE JE NIKIOTA NDOTO

 

Ndoto ni ripoti apewayo mtu akiwa amelala usingizini. Unao wajibu wa kushughulikia hiyo ripoti.

Ø  Jambo la kwanza la kufanya ni kubaini kama ripoti hiyo ni njema au mbaya.

Ø  Jambo la pili ni kuanza kushughulikia ndoto hiyo haraka sana pindi tu uamkapo.

 

Kwa nini iwe haraka? Ni kwa sababu baada ya ndoto tu utekelezaji wa ulichokiota huanza mara moja. Na kwa kuwa ndoto zipo za aina tatu, ni vyema kufanya haraka. Ndoto zina tafasiri zake. Usiende kwa wachawi kwa ajili ya kupata tafasiri zake. Mfuate mchungaji wa Mungu na aliyeokoka mwelezee hiyo ndoto. Kama ndoto ni ya kimungu, ya mambo mazuri iombee itokee mara moja kwa Jina la Yesu. Endapo ndoto ni ya kishetani (ndoto chafu ya mambo mabaya), inabidi uiharibu isitokee kwako kwa Jina la Yesu.

 

Vijana wa Showers of Glory wakicheza mbele za Bwana Jumapili 21/8/2016.

 

Endapo mtu hujaokoka hadi leo hii, siyo rahisi kuharibu ndoto mbaya zinazokuja kwako. Inabidi yawepo mahusiano mema na Bwana Yesu kwanza ili kukabiliana na ndoto mbaya za maishani mwako kwa Jina la Yesu.

 

 

©  MEDIA & INFORMATION MINISTRY, GLORY OF CHRIST (T) CHURCH ==GCTC== Tel: +255765979866 / or +255713459545 MOROGORO CHURCH